Diamars atardi a tuma lugar un reunion di suma importancia cu e departamentonan clave pa loke ta trata siguridad na nos fronteranan esta; Guarda Costa, KPA, Guarda Nos Costa, Inmigracion y NCTVI y den cuadro di e incidente cu a tuma lugar recientemente, caminda un boto cu cinco persona indocumenta abordo a intenta pa drenta nos pais. Di e incidente aki a logra gara un persona di e cinconan abordo di e boto pues tur departamento den cuadro di siguridad na nos frontera ta investigando e caso pa por deduci mas informacion di e organisacion.
Minister di Husticia y Asuntonan Social Sr. Rocco Tjon a splica cu durante e reunion aki a logra yega na un planeamento central te pa fin di aña, pa loke ta trata “kustsurveillance” y tur e departamentonan menciona lo forma parti di esaki. A haci palabracionnan strategico cu e departamentonan concerni, pa asina yega na palabracionnan concreto pa por sigui aumenta e siguridad na nos frontera.
Siguiemente, ta bay reenforsa e ekiponan encarga cu e vigilancia riba caya pa siguridad na nos frontera como tambe lo bay reenforsa e personal cu ta traha den e “radar kamer”. Palabracion a wordo haci entre e departamentonan pa reuni cada dos siman pa asina por aumenta e siguridad na nos frontera.
E mandatario a sigui splica cu pa loke ta e “bestedingsplan” y e plan di accion pa siguridad na nos frontera lo yega na un plan den corto plaso pa aloca fondonan di Hulanda cu a wordo poni disponibel pa esakinan. Pues den cuadro di e palabracionnan haci ta asina cu Guarda Nos Costa, Guarda Costa, KPA y Inmigracion lo bay aloca personal pa forma parti di e ekipo aki cu lo percura cu constantemente tin patruyanan na nos costa, pero tambe lo percura pa constantemente tin personal den e “radar kamer” pa asina por monitorea kico tur ta sosode.
Por ultimo Minister Tjon a remarca cu na mes momento tambe lo bay sigui inverti den e radarnan, pero un paso hopi importante tambe ta cu tur e departamentonan ta di acuerdo pa por explora con por bay haci uso di Arumillers pa e parti di patruya pa cu esaki.
