Manera ta conoci, recientemente a tuma luga un caso sumamente lamentabel caminda un turista crucero a bira victima di un agresion fisico cual a lag’e malamente herida. Ta trata di un persona masculino di nacionalidad Canades, kende tawata abordo di e Voyager of the Seas hunto cu su famia, y a wordo agredi pa tres hende homber den e parkinglot banda di Waf. Na momento cu esaki a sosode, Cuerpo Policial di Aruba a activa mesora, y awe por bisa cu a logra haci tres detencion pa cu e caso aki.
E caso aki ta uno lamentabel, mirando e sensitividad y e seriedad di e situacion caminda cu no solamente a causa daño fisico na un persona, pero esaki a bay na consecuencia di Aruba su turismo. Aruba ta conoci mundialmente pa ta un di e islanan mas “safe” den Caribe, y e tipo di actonan aki ta perhudica e bon imagen cu Aruba tin pa cu esaki. Pa e motibo aki, Ministerio di Husticia y Asuntonan Social a pone tur recurso disponibel pa resolve e caso aki, y na mes momento ta condena e tipo di actonan aki y no ta tolera ningun tipo di menasa contra e siguridad di nos hendenan y nos bishitantenan.
Asina por bisa cu na momento cu autoridad a wordo poni na altura di lokual a sosode, Recherche y varios unidad di Cuerpo Policial a activa mesora y a priorisa e caso aki. Ademas di esaki, Korpschef a drenta den contacto cu e famianan mesora pa asina mantenenan informa, y tambe a tuma contacto cu autoridadnan Canades pa mantene nan informa di e sucedido como tambe e progreso di esaki. Danki na e bon trabou di Cuerpo Policial di Aruba, no a dura hopi prome cu a haci e prome detencionnan y awe e di tres detencion a cay.
Ministerio di Husticia y Asuntonan Social ta manda palabranan di pabien na Recherche y Cuerpo Policial di Aruba, cu a haci un tremendo trabou, a atende e famia atentamente, y a demostra cu Aruba no ta tolera e tipo di actonan aki. Asina por bisa cu mas y mas ta pone recursonan disponibel pa combati criminalidad y violencia na Aruba y ta manda un mensahe cu autoridad lo sigui actua cu cero tolerancia pa e tipo di actonan aki.