Minister di husticia Rocco Tjon Tabata presente na e 53 aña di existencia di organisacion di Inmigracion. Segun e mandatario cada un di e ambtenaar nan mester orguyoso di nan balor cu nan tin cu nan ta agrega pa pais Aruba.
E balor agrega den full e cadena hudicial ta obvio, pero ta importante pa gobierno percura cu e posicion huridico keda regla manera debe ser. Den presencia di tur e ambtenaar nan e mandatario a duna di conoce cu esaki no ta solamente un prioridad di gobierno, pero hunto cu e director ta pa percura pa finalisa e aspecto aki mas lihe posibel.
Segun Minister Tjon December aña pasa e ultimo version di e formatieraport a pasa ministerraad esaki kiermen cu hunto cu e leiding y sindicato mester percura pa finalisa e proceso mas lihe posibel. E mandatario ta kere cu e posicion huridico y e aspectonan interno si nan no ta regla obviamente e departamento no lo por atende cu e retonan externo.
Den full e cadena hudicial y mas importante na momento cu ta papia riba e siguridad di frontera ta cada un di e ambtenaar nan di inmigracion tin un rol Importante. Tin hopi informacion cu ta bin via di inmigracion y si percura cu e informacion aki keda comparti mas miho den full e cadena hudicial lo percura pa haci Aruba hopi mas sigur tambe.
E echo cu tur e stakeholdernan den e cadena ta presente pa a celebra hunto cu e departamento completo cu su 53 aña di existencia ya caba ta demostra na cada un di e ambtenaar nan con importante nan ta pa Aruba pero tambe hopi importante pa e parti hudicial.