Diamars merdia, Minister di Husticia y Asuntonan Social Sr. Rocco Tjon, a reuni cu e delegacion di INTERPOL conforme e “Resolution No. 7”cual ta trata e “National Central Bureau Quality Standards”. Ta asina cu e Secretario General di INTERPOL ta haci bishitanan periodicamente na tur e diferente “National Central Bureau” (NCB) di cada pais, pa asina evalua si cada NCB ta opera conforme e standardnan internacional. Un reunion sumamente positivo pa pais Aruba, den cuadro di siguridad na nos frontera.
E “Resolution No.7” a wordo estableci pa asina controla e calidad di servicio cu ta wordo brinda pa cada departamento di INTERPOL rond di mundo. Durante e evaluacion aki, cada pais ta ricibi un rapport cu un evaluacion di nan funcionamento y ta wak tambe si ta usando e instrumentonan cu ta wordo poni disponibel na un manera eficiente pa por combati criminalidad. Durante e bishita aki nan a aserca diferente partnernan, manera Cuerpo Policial (KPA), Ministerio Publico, Inmigracion y demas partnernan den e cadena hudicial, pa asina haya sa mas con e cooperacion ta andando y na mes momento, wak unda tur nan por brinda nan apoyo.
Bisando esaki, a haci un “benchmark” den e region y di esaki por a constata cu Aruba ta bastante pro-activo y activo tambe pa loke ta e uso di e diferente instrumentonan cu ta wordo poni disponibel a base di INTERPOL. Esaki ta algo cu en berdad nos ta wak, mirando cu algun tempo pasa a comunica tocante e diferente iniciativanan cu a wordo tuma door di INTERPOL, manera e I-Arms pa combati e uso di armanan di candela ilegal na Aruba, pero tambe “INTERPOL aan de grens” cual ta e tecnologia di database pa asina eleva siguridad na nos frontera.
A identifica oportunidadnan tambe riba e parti di cybersecurity como tambe e uso di tecnologia y inovacion pa combati criminalidad. Lo bay bin oportunidadnan tambe pa cursonan pa esnan cu ta traha den e cadena hudicial, cual lo bay man den man cu scol di polis cual dentro di poco lo wordo transforma den un academia di husticia. E rapport final lo wordo emiti dentro di poco, cual lo wordo haci disponibel pa publico por wak esaki y asina mira pa nan mes e trabou cu INTERPOL ta haci pa Aruba den cuadro di combati criminalidad den su totalidad. Por constata cu un di e bentahanan directo pa INTERPOL ta cu, hopi di e tecnologianan aki ta wordo haci disponibel pa tur esnan cu ta forma parti di INTEPROL di cual mayoria biaha sea no tin ningun costo adicional mara na dje, of ta mara na inversionnan minimo.
Por ultimo, Minister Tjon a indica di ta sumamente contento cu e resultado preliminario di e evaluacion, y a duna un pabien na e ekipo di NCTVI cu ta haciendo un tremendo trabou den combati criminialidad y asina eleva siguridad na nos frontera.
