Diahuebs merdia, a tuma luga e firmamento di e contract pa loke ta e opleiding pa mental health professionals na Aruba. Ta asina cu diferente stakeholders di Stuurgroep-GGZ a firma pa asina inicia e opleiding pa mental health professional, esaki ta un novedad pa Aruba pero tambe pa nos region, caminda dentro di poco lo tin 17 persona mas cu lo ta opgeleid pa por brinda e cuido necesario. Algun tempo pasa a aproba 250mil florin pa asina por percura cu e 17 candidatonan aki por bay e opleiding pa mental health professional. Un paso sumamente importante cual ta fit perfecto den e vision di Ministerio di Husticia yAsuntonan Social.
Segun minister di Husticia y Asuntonan Social Rocco Tjon, e vision ta pa haci e cuido ora ta trata adiccion, pero tambe salud mental mucho mas accesibel pa un y tur. A base di esaki lo bay tin 17 profesional cu no ta resorta solamente bou di un departamento, pero cu ta resorta bou di diferente departamentonan, pa di e forma ey brinda e ayudo y e cuido necesario ora ta toca e parti di salud mental. E opleiding aki ta bay wordo brinda door di Rino Zuid den cooperacion cu Mental Health Caribbean, y e ta bay ta un opleiding reconoci pa di e forma ey, dentro di poco Aruba lo tin su Geestelijk Gezondheidswerkers activo akinan na Aruba mes, pa haci e cuido uno mucho mas accesibel y brinda un miho cuido.
Manera ta conoci a base di e vision a termino largo tin diferente werkgroepen cu ta trahando, cual ta consisti di trahadonan di e veld. Pues, e bunita di e proyecto di mental health professional opleiding ta, cu el a anace for di e veld mes y for di ministerio di Husticia y Asuntonan social a aproba esaki mesora, pa di e forma ey aporta tambe na eleva e calidad di cuido.
Por ultimo, e mandatario a expresa di ta sumamente satisfecho di a presencia FADA, Witgele Kruis, Stichting Hunto (FMAA y SPD), como tambe Respaldo, durante e momento special aki, mirando cu e personanan cu ta bay participa na e opleiding aki, ta bin for di e departamentonan aki.