Rob Jetten, minister di Klima i Energia ta hiba un bishita di trabou na Boneiru, Aruba i Kòrsou di 8 te ku 17 di mei. E bishita ta den kuadro di e transishon di klima i energia na e islanan.
Boneiru
E biahe ta kuminsá riba 8 di mei na Boneiru, na unda e minister ta hiba kombersashon ku entre otro miembronan di kolegio ehekutivo i Bonaire Future Forum. Tambe tin un kombersashon ku representantenan di WEB (Water- en Energiebedrijf Bonaire), Contour Global i BBT (Bonaire Brandstof Terminals) riba programa. Anochi ofisialmente ta presentá e rapòrt di konseho di e Klimaattafel Bonaire na minister Jetten. Riba 9 di mei e minister ta hiba un bishita na Lac Bay, na unda e ta haña un rekorido di DCNA (Dutch Caribbean Nature Alliance) i e ta papia ku empresarionan tokante di sostenibilidat durante establesimentu di Business Federation Bonaire.
Aruba
Na Aruba minister Jetten ta papia ku Gobernador, Promé Minister i e Presidente di parlamento i lidernan di frakshon. E bishita tambe ta den kuadro di e promé Caribbean Climate & Energy Conference (CCEC) ku Aruba i Hulanda ta organisá di 10 te 12 di mei. Durante e konferensia representantenan di e islanan den Karibe, pero tambe partidonan relevante pafó di e region manera por ehèmpel estado insular den Oséano Pasífiko, organisashon di Nashon Uní, instituto di konosementu i instansia finansiero ta kombersá ku otro tokante di e posibilidatnan pa aselerá e transishon di klima i energia na estadonan insular chikitu. Riba e último dia di e konferensia e minister ta bishitá vários proyekto di energia duradero i e ta tene kombersashon ku studiantenan di e Universidat di Aruba i di EPI MBO.
Kòrsou
E bishita di trabou ta sigui riba 15 di mei na Kòrsou. Aki e minister ta papia ku entre otro Gobernador, Promé Minister i e minister di Desaroyo Ekonómiko ku ken e ta firma un akuerdo pa fortifiká e kolaborashon entre e dos paisnan riba tereno di energia duradero. Riba 16 di mei e minister ta hiba un diskurso pa studiantenan di e Universidat di Kòrsou, e ta bishitá e sentro di investigashon di Carmabi i e ta haña un presentashon di Climate Change Curaçao tokante di e impakto di kambio di klima na e isla. Minister Jetten a haña un invitashon di representantenan di e organisashon di LHBTIQ na Kòrsou; ku nan tambe e mandatario ta tene un kombersashon. Riba último dia di e bishita, ku ta 17 di mei, e minister ta bishitá Curoil i e parke di bientu di Aqualectra den kuadro di e suministrashon di energia na e isla.
