‘Arubahuis ta un instituto di Aruba na Hulanda cu tin un tarea importante den e relacion entre Aruba y Hulanda. Den e pensamento aki Arubahuis ta mantene y estrecha su relacion y lasonan na Hulanda riba diferente tereno manera gubernamental, economico, y enseñansa.’ Esaki segun declaracion di Minister Plenipotenciario mr. Ady Thijsen.
Minister Thijsen ta sigi bisa cu den 1 aña cu e ta ocupa e posicion di Minister Plenipotenciario ela desaroyo un maneho y vision pa Arubahuis. Un vision unda Aruba mester ta mas visibel na Hulanda y na Union Europeo. ‘Nos no ta concentra unicamente riba Binnenhof, cu ta e Gobierno Central y e ministerionan. Nos ta buscando contacto cu municipionan, provincianan, instituto, Hogeschool y Universidadnan pa mira riba cual tereno nos por coopera cu otro. Nos a bishita 13 municipio y awor aki nos ta bai haci un inventarisacion cual municipio tin potencial pa cu cooperacion. Tambe nos contacto cu diferente Hogeschool ta parti di e inventarisacion, riba cual tereno nos mester sigi cu otro. E vision aki ta costa tempo y ta exigi hopi di e personal, pero nos ta kera cu tin potencial pa Aruba den e vision aki,’ asina Minister Thijsen a bisa.
E mandatario a sigi bisa cu e contactonan cu e diferente embahada ta dunando su frutanan. ‘Cu Italia por ehempel ya caba nos a logra dos proyecto. Un di nan ta un anochi cultural den e Instituto Cultural di Italia na Amsterdam y e otro ta e bishita di e entrepreneur di biña Hubert Yarzagaray na e region di Treviso. Y ainda tin algun proyecto den pipeline cu lo ta benefisioso pa Aruba. Asina nos ta moviendo cu otro embahadanan y nos ta spera cu ora e momento ta oportuno nos bin cu mas informacion riba esaki,’ segun e mandatario.
Pa loke ta e renobacion di e edificio di Aruba na R.J.Schimmelpennincklaan, sr. Thijsen a bisa cu esaki ta canando hopi bon y cu tin un proyect manager a keda apunta cu ta guia e proceso na un manera profesional conhuntamente cu DOW di Aruba.
Por ultimo Minister Thijsen kier a comenta riba e nombracion di un director pa Arubahuis. ‘En berdad cu sra. Glenda Hernandez a bin pa tres luna den espera cu e director nobo lo keda apunta. Gobierno a tene un solicitud abierto y un comision a escohe e candidato adecua pa ocupa e puesto di director di Arubahuis. Ta berdad cu e proceso a dura mas largo cu a premira y mi ta contento cu sra. Glenda Hernandez tabata dispuesto pa continua den e funcion di director a.i. pa asina cu su experticio y experencia, atende cu algum asunto importante, entre nan e renobacion di Arubahuis y reorganisacion di Arubahuis. Pa loke ta e reorganisacion, tin un plan cla cu ta den proceso pa keda ehecuta. Di e manera aki mi ta sigur cu Arubahuis ta dispone di tur instrumento nesesario pa ehecuta su funcion como digno representante di Aruba na Hulanda,’ segun declaracion di Minister Plenipotenciario mr. Ady Thijsen.
E potret ta cortesia di Arubahuis
