ORANJESTAD, Aruba
Diaranson atardi Minister di Desaroyo Teritorial, Infrastructura y Medio Ambiente Marisol Lopez – Tromp a trata e tema y ley di spearfishing/ tiramento di pisca cu harpun. Recientemente diferente informacion a surgi den medionan di comunicacion unda cu personanan cu ta practica spearfishing kier continua cu esaki a pesar cu e ta prohibi pa ley. Den cuadro di esaki dos Minister a trece dilanti cu nan ta trahando pa basta tempo riba un cambio di ley, caminda cu lo introduci un lista di excepcion pa esnan cu ta ‘biba’ di spearfishing. Den e mesun articulo aki a haci remarca cu Minister Lopez – Tromp no lo kier firma pa e cambionan aki tuma luga pa cual Minister Lopez – Tromp a aclaria e ponencianan aki.
Como e Minister encarga cu entre otro medio ambiente, Minister Lopez – Tromp ta e prome yama pa defende leynan y tradadonan (internacional) di naturalesa y medio ambiente. E prome punto cu Minister Lopez – Tromp a trece dilanti ta cu eventual cambionan cu kier haci lo mester pasa a traves di Parlamento di Aruba. Na di dos luga, e ta necesario ricibi y inclui conseho di Departamento di Naturlalesa y Medio Ambiente (DNM) y Comision Flora y Fauna riba locual ta posibel pa haci excepcion of no.
Pues ora cu ta considera pa haci excepcion pa esnan cu ta tira pisca cu harpun pa trece cuminda riba mesa / biba di dje, mester tin condicionnan bon cla stipula. Entre otro, pa defini ken e grupo di personanan aki ta pa por registranan, e aspecto di control y mas. Pues pa motibo cu e puntonan aki no ta hancra na e proposicion treci dilanti pa duna excepcion, espacio ta habri pa ken cu ta por haci kico cu ta. Cual no ta e intencion y pa cual Minister Lopez – Tromp a accentua cu e no por a apoya e proposicion aki.
E condicionnan presenta pa DNM y Comision Flora y Fauna
Director di DNM Gisbert Boekhoudt a splica cu ta importante pa menciona e motibo pa cual a introduci e ley di prohibicion aki. E ley ta na vigor ya pa hopi aña pa proteha coralnan y bestianan cu ta core peliger di extincion. Sinemargo, a pesar di prohibicion pa tira pisca cu harpun esaki toch e ta wordo practica aki na Aruba.
Pa un cambio di ley a traves di Parlamento, ta importante pa garantisa diferente punto manera: E control di ki ora ta drenta cu e pisca, cuanto ta drenta, ken ta e usuarionan, cuanto pisca un usuario por tin cu ne, pero tambe cua piscadonan ta bin na remarca pa uza e instrumento aki.
Banda di esaki tambe lo mester palabra cua pisca, ki tamaño, cua temporada y cua parti di lama por practica esaki, Gisbert Boekhoudt a splica.
