Masha danki pa biba nos Cultura di Fin di Aña
Diaranson anochi Minister di Cultura tabata presente na Centro di Bario Tanki Lender pa felicita y gradici tur e participantenan di e Festival Infantil y Hubenil di Dande organisa pa Comision Promove Cultura. Un total di 18 participante den 4 categoria di edad, a subi tarima pa deleita e publico cu e musica di Dande cu ta nos folklore y tradicion di Fin di Aña. Cada un di nan a duna un bunita presentacion, a canta e Dande cu hopi pasion y tabata un ganador riba nan mes. Sinembargo den cada categoria a brinda un premio pa esun cu a resalta mas. Reina di Dande di categoria 4 pa 6 aña ta Alyna Henriquez, Reina di Dande 7 pa 9 aña ta Kitai de Jongh, Reina di Dande 10 pa 12 aña ta Lizziene Webb y Reina di Dande 13 pa 17 aña ta Jorienne Angela. Minister Maduro tabata tin e honor e placer di por a corona tur e ganadornan y felicita nan pa nan bunita aporte na Cultura di nos Pais. E mandatario ta gradici tur e agrupacionnan cu a compaña e hobennan. Palabra di gratitud tambe ta bay pa Comision Promove Cultura, Comision Celebracion Dianan Nacional, Setar y tur instancia y persona cu ta aporta pa asina por organisa e festival di Dande Infantil y Hubenil cu ta brinda nos hobennan y Pueblo en general e oportunidad pa nos biba nos Cultura di Fin di Aña. Masha danki y Ay Nobe!
