Minister Maduro ta atende reunion di Steering Committee di cartac na Barbados

CARTAC ta yuda Aruba cu diferente asistencia tecnico y training

E siman aki Minister Maduro di Finansa ta atende e reunion di Steering Committee of the IMF Caribbean Technical Assistance Center (CARTAC) na Barbados. CARTAC ta IMF su organisacion cu ta yuda cu asistencia tecnico y training den e region di Caribe. Na aña 2018 Aruba a bira miembro di CARTAC y desde e momento eynan Aruba su institutonan a bin ta ricibi varios asistencia tecnico y tambe training importante pa capacitacion di e personal publico. 

CARTAC ta brinda diferente asistencia na Aruba

Por menciona cu CARTAC a yuda Departamento Economico cu e modelo macro-economico MARUBA. Na Oficina di Estadistica CBS, CARTAC a yuda cu Aruba su Cuentanan Nacional y tambe cu CBS su Estadistica di Prijs. E personal di CBS por a atende diferente seminario di CARTAC pa amplia nan conocemento. Na Departamento di Aduana tambe CARTAC a brinda asistencia riba topiconan manera ‘Performance Management, Risk Management, Post Clearance Audit y Trusted Trader Program’. CARTAC a haci un evaluacion tambe di e funcionamento di Departamento di Impuesto den cual a para keto na e funcion administrativo, auditoria, servicio na cliente, proceso di obheccion (bezwaar), atraso den procesa declaracion di impuesto y restitucion. Banda di esaki CARTAC a haci un evaluacion di Aruba su sistema fiscal y a asisti DIMP den e trabounan riba introduccion di un BTW pa Aruba. Na Departamento di Finansa DF, CARTAC ta yuda cu scenario pa refinancia e debe di COVID-19 traha cu Hulanda, y cu planificacion fiscal den cual ta mehora e proceso presupuestario y ta fortifica e maneho financiero di Aruba. Personal di DF tambe a participa na varios seminario di capacitacion di CARTAC riba maneho di debe. Banco Central tambe ta ricibi asistencia tecnico di CARTAC pa por haci, entre otro, un bank stress-testing.

Aruba ta sigui apoya e trabou di CARTAC den region di Caribe

Minister Maduro lo hiba palabra durante e reunion di e Steering Committee na unda lo elabora riba tur e asistencia y training cu CARTAC ta brinda na Aruba. E mandatario den nomber di Gobierno di Aruba, lo duna un  ‘commitment’ cu Aruba lo sigui apoya e trabou importante cu CARTAC ta desplega den nos region.