Si no ta pa e pandemia awe Aruba lo ta conoce surplus
Durante e reunion publico den Parlamento riba e Najaarsnota 2021, Minister Maduro a brinda splicacion di e cambio nan cu Presupuesto 2022 lo conoce pa asina por refleha e situacion financiero di nos Pais awo cu mitar aña a pasa. Den su splicacion Minister Maduro a splica riba e deficit di nos Pais.
Surplus na 2019 ta bira un deficit di 1028 miyon florin door di pandemia
Di momento cu a presenta e Memorandum Financiero y Economico na aña 2018, trabou serio a wordo haci pa mehora e finansa publico di nos Pais. Asina por mira cu na aña 2019 Aruba ta logra yega na un surplus di 4 miyon florin, despues cu pa mas di 12 aña Aruba no a conoce un presupuesto cu un surplus. Pa aña 2020 tambe a presupuesta un surplus di 46 miyon florin, pero e pandemia a pone entrada di Gobierno cay atras y gasto di gobernacion subi grandemente ya cu Gobierno mester a percura pa yuda esnan cu a keda sin entrada den e pandemia. Esaki a produci un situacion di un deficit di 1028 miyon florin.
A logra baha e deficit den 3 aña te cu 25 miyon florin
Prome y durante e pandemia Minister di Finansa a traha na un manera serio pa asina contene y gastonan di gobernacion pa asina baha e deficit. Asina por mira cu di e deficit presupuesta na 2020 di 1028 miyon, a realisa 764 miyon. Na 2021 a logra baha e deficit presupuesta di 585 miyon florin y a realisa 534 miyon florin. Despues na aña 2022 a presupuesta un deficit di 227 miyon cu awor ta wordo baha na 148 miyon florin. Pa aña 2023 ta baha e deficit te cu 25 miyon florin. Depende di con economia bay, kizas lo por logra yega na un presupuesto balansa.
Rumbo pa un surplus
Minister Maduro ta enfatisa cu un trabou grandi ta wordo haci pa Aruba su profesionalnan pa asina por produci un presupuesto pa Pais Aruba cu ta adapta na e realidad financiero di nos Pais. Gobierno ta realisa cu Aruba mester yega atrobe na un situacion di surplus na unda cu no ta crea debenan nobo pa cubri deficitnan presupuestario, pero den e proceso aki mester tene cuenta pa no stroba e proceso di recuperacion di nos economia. E rebaho di un deficit di 1028 miyon pa 25 miyon den apenas 3 aña di tempo ta muestra di e seriedad cu cual ta traha rumbo pa surplus y pa un finansa publico manehabel. Si no ta pa e pandemia awe Aruba lo ta conoce surplus.
