Minister Maduro riba BBO na frontera: Presupuesto 2023 ta conta cu entrada di BBO na frontera

Aña pasa durante tratamento di Presupuesto 2023, Minister Maduro di Finansa a splica cu e presupuesto di Pais Aruba pa aña 2023 lo bay conta tambe cu entrada genera pa cobransa di BBO na frontera. E mandatario a splica cu door cu ainda no por bay cambia e sistema di BBO pa esun di BTW, a tuma e desicion pa cobra BBO na frontera ora di importa producto. 

Introduccion premira pa 1 di juli 2023

Durante e tratamento di Presupuesto 2023, Minister Maduro a informa cu BBO na frontera lo wordo introduci na juni 2023. Sinembargo a surgi tardansa. E concepto di Ley di BBO na frontera a yega na Parlamento y awo Parlamentarionan tin espacio pa haci pregunta te cu medio juni. Despues cu Gobierno haya esaki lo contesta pa asina Parlamento por prepara pa e debate publico den e ultimo dos siman di juni. Esaki ta pone cu e introduccion di e Ley di BBO na frontera awo ta premira di por drenta na vigor 1 di juli 2023.

BBO na frontera ta premira pa genera 15 miyon florin

Minister Maduro a indica cu BBO na frontera ta premira pa genera 15 miyon florin den aña 2023, di cual 10 miyon florin lo bay pa caha di Gobierno y 5 miyon florin lo bay pa AZV. Esakinan ta fondo cu Gobierno ta conta cu nan pa asina Presupuesto 2023 por conta cu surplus.

Ta crea level playing field y ta hisa compliance

E sistema di cobransa di BBO na frontera ta trece cune un miho ‘level playing field’ pa sector comercial, ya cu tur hende cu ta importa ta contribui di mesun manera na caha di Gobierno. Banda di esaki e sistema aki ta percura pa un miho cumplimento cu ley di impuesto, e ta hisa compliance.