Minister Maduro di Finansa ta informa: Ta finalisando e trabounan pa por presenta presupuesto 2024 na tempo na parlamento di Aruba

E presupuesto lo conta cu un surplus cu ta necesario pa mehora e finansa publico di nos Pais

Siman pasa Minister Maduro a reuni cu expertonan di Departamento di Finansa pa asina haya un bista di e trabounan cu falta pa asina por entrega Presupuesto di Pais Aruba pa aña 2024 na tempo na Parlamento di Aruba. Esaki lo ta e di dos presupuesto cu ta wordo entrega na tempo despues di hopi decada cu Gobiernonan no a tene nan mes na e diciplina financiero aki. Presupuesto 2024 lo ta e di dos presupuesto cu lo conta cu un surplus, cual ta necesario pa asina por mehora e finansa publico di nos Pais.

Trabou continuo pa mehoracion

Manera ta conoci desde aña 2017 cu Minister Maduro a asumi e responsabilidad como Minister di Finansa, e mandatario hunto cu su ekipo di experto a bin ta traha pa por mehora e finansa publico di Aruba. Den e proceso aki a busca yudansa cerca IMF pa revisa e proceso presupuestario y a bin ta aplica recomendacionnan pa mehora e proceso presupuestario di Gobierno di Aruba. Mehoracion di e maneho financiero tambe ta un proceso cu ta wordo sigui den e supervision financiero di CAFT y ta un punto importante tambe di e Landspakket. Ta un esfuerso continuo ta wordo haci pa mehora e proceso pa hinca e presupuesto den otro y pa duna miho splicacion financiero haciendo uzo tambe di grafico. Banda di esaki ta haci esfuerso pa cada kwartaal presenta informacion riba e ehecucion di e presupuesto den Uitvoeringsrapportages URK, y den aña 2023 ta presenta pa prome biaha un Nota di Comienso di Aña cu hunto cu e Nota di Fin di Aña y nan respectivo Cambio di Presupuesto, ta brinda transparencia financiero riba e manera con fondonan publico ta wordo maneha pa Gobierno di Aruba. E ultimo añanan e enfasis ta riba e necesidad pa e presupuestonan di Pais Aruba por conta cu un surplus, y e mehoracion aki nos por mira bek den presupuestonan 2023 y 2024.

Surplus ta necesario pa mehora finansa publico

Aruba a conoce presupuestonan cu deficit hopi grandi pa cual a traha debe pa cera e buraconan financiero. Por ehempel, Presupuesto 2014 na cierto momento a conta cu un deficit di 444 miyon florin, un situacion alarmente cu a hiba na e supervision financiero di CAFT na nos Pais desde aña 2015. Mas deficit, ta mas debe, ta mas gasto di interes y menos fondo pa inversion na bienestar di Pueblo. Aruba no por a sigui asina mas, y pesey na aña 2017 a scoge un otro rumbo financiero pa Aruba den cual a traha pa baha deficit, para e crecemento di debe pa asina por cuminsa baha e presion di gasto di interes, cu ta un di e gastonan mas grandi di gobernacion na Aruba. Presupuesto 2023 ya caba ta conta cu e surplus necesario y awo Minister Maduro di Finansa ta prepara pa entrega Presupuesto 2024 tambe cu un surplus na Parlamento di Aruba. Di e manera aki por sigui riba e caminda di mehoracion di finansa publico cu ta brinda stabilidad financiero pa Pais Aruba.

Comunicado Minister Maduro di Finansa