E modelo ta midi, entre otro, e riesgo di e fondo di AZV pa presupuesto di Pais Aruba
E siman aki Minister Maduro di Finansa a reuni cu e director y ehecutivonan di AZV pa asina por haya un presentacion di AZV su modelo pa pronostica e cuadro financiero multi-anual di e fondo di seguro medico di Aruba. E modelo aki pa pronostica e riesgonan financiero di AZV, ta uno importante pa e maneho presupuestario di nos Pais, ya cu e modelo ta midi, entre otro, e riesgo di e fondo di AZV pa presupuesto di Pais Aruba.
Conforme e Ley di AZV, si e fondo di AZV conoce deficit, e ora Gobierno tin un obligacion pa presupuesta e fondonan necesario y cera e buraco financiero aki via un ‘landsbijdrage’ cu ta wordo duna na AZV. E ultimo añanan aki AZV a hiba un control di gasto y hunto cu e entrada genera pa BAZV, e fondo di seguro medico di Aruba a wordo fortifica y ta pone cu Gobierno no mester a hinca fondo den AZV via un ‘landsbijdrage.’
E fondo di AZV ta stabil, sinembargo tin factornan manera e costo di remedi, costo di dunado di cuido medico, ‘vergrijzing’ di nos populacion, inversionnan necesario den cuido na Aruba, cu ta forma un riesgo financiero pa e fondo di AZV. E modelo cu expertonan paden y pafo di AZV a diseña, ta proyecta e risiconan aki pa e añanan nos dilanti y ta brinda un bon ‘tool’ pa guia e desicionnan necesario pa asina e fondo medico di AZV por keda stabil sin cu Gobierno mester pone placa aden via un ‘landsbijdrage.’
Minister Maduro a expresa di ta contento cu e modelo aki di AZV, ya cu e ta pas den e trabounan cu ta wordo haci pa presenta den Presupuesto 2024 y siguiente presupuestonan di Pais Aruba, un bista di e risiconan financiero cu por tin efecto riba e presupuesto di e aña coriente en particular y Aruba su finansa publico en general.
Proximanente Minister Dangui Oduber hunto cu AZV lo presenta e modelo aki na Conseho di Minister, Parlamento di Aruba y Pueblo en general.
