Un bunita festival dedica na musica tradicional di nos Pais
Diadomingo Minister Maduro di Cultura tabata presente na e Festival di Caha di Orgel cu a tuma luga na Centro di Bario Ayo organisa pa sr. Giovanny Geerman y famia di Cah’i Orgel Nos Herencia. Tabata un atardi yena cu musica tipico, cuminda crioyo y ambiente unico na unda cu grandi y chikito a disfruta di locual ta nos musica tradicional.
Un total di 15 caha di orgel a deleita tur presente, na unda cu e publico tabata por a baila e piesanan aki y asina contribui na nos cultura. E aña aki e festival a wordo dedica na sr. Nay Felicia, sr. Chomi Boekhoudt y sr. Juan Willems. Na e ocasion aki, Minister di Cultura a hiba palabra gradiciendo e grupo Cah’i Orgel Nos Herencia pa a organisa e festival y tambe na tur tocado di caha pa nan presencia pa asina sigui cu e bunita tradicion di musica di Cah’i Orgel. Pa Minister Maduro tabata un placer pa tabata presente y pa deleita e publico tocando un piesa riba e Caha di Orgel Johanna y despues marca algun paso riba e dushi ritmo di musica di Cah’i Orgel. Tabata bunita pa mira e entusiasmo cu tin entre e grandinan y tambe cerca e hobennan cu ta prepara pa sigui carga nos tradicion. ‘Cultura bo tin cu bib’e y esaki ta e manera pa haci’e, door di sigui cu nos tradicion, aprecia y carga locual ta di nos,’ tabata palabranan expresa pa e mandatario.
Minister Maduro ta gradici grupo Cah’i Orgel Nos Herencia pa a organisa e tremendo festival aki y tambe tur esnan cu a presencia e festival aki y haci’e uno exitoso. E mandatario ta gradici specialmente sr. Giovanny Geerman kende a cumpli 30 aña dedicando su mes na locual ta e musica di Cah’i Orgel. Masha pabien tambe na e baluartenan sr. Nay Felicia, sr. Chomi Boekhoudt y sr. Juan Willems pa nan bunita trayectoria cuidando nos herencia cultural di musica di Cah’i Orgel pa nos por biba nos cultura.
Comunicado Minister Maduro di cultura
