Siman pasa Minister Maduro di Cultura hunto cu Minister President y e team di Aruba Amenities a tene un conferencia di prensa na Ser’i Ayo pa asina duna publicidad na e hecho cu e prome fase di e renobacion di e patrimonio nacional importante aki pa nos Pais a keda finalisa.
Ayo ta un luga unico
Pa e ocasion aki Minister Maduro a hiba palabra pa expresa e importancia di Ser’i Ayo semper tabata tin pa nos localnan y esnan cu ta bishita nos. “Awe nos ta para dilanti di un patrimonio nacional natural unico y masha importante den nos region. Un patrimonio nacional cu un historia impresionante di nos antepasadonan indigeno, cual nan pinturanan a keda conserva y ta fungi awe como testimonio di nan existencia. Importante paso, nos Pais ta un di e poconan den region cu tin pinturanan di indigeno riba baranca. Ta evidente cu Ayo tabata un luga hopi importante den pasado, ya cu ainda nos ta sintie ora nos ta cana memey di e barancanan y ta experiencia e trankilidad, e paz cu e luga aki ta duna, rondona cu su flora y fauna tipicamente di Aruba.”
Ayo ta bon bishita pa local y turista
E mandarario a sigui splica cu “Ayo ta un luga hopi bishita tanto pa nos hendenan local como turistanan. Muchanan di scol, padvinderij, gruponan di entre otro di famia y turistanan ta bishita Ayo pa keiro, pa haci ehercisio of djis pa disfruta, contempla e naturaleza y relaha un poco for di e bida druk. Ayo ta un luga preferi tambe pa practicantenan di yoga y meditacion den un ambiente trankil di nos naturalesa. P’esey mi ta contento cu awe a finalisa e prome fase di renovacion. Ta importante pa nos keda cuida nos patrimonionan nacional pa asina nos hendenan, turista y futuro generacionnan tambe por sigui disfruta di e patrimonio y conta su historia.”
Lo sigui mas trabou na Ayo
Den e tempo nos dilanti Aruba Amenities lo sigui traha riba na Ser’i Ayo pa asina por introduci un ruta interpretativo na unda cu yudansa di ‘QR Code’ por haya informacion botanico, geologico y historico di e sitio importante aki. E patrimonio natural nacional aki lo conoce tambe un centro pa bishitante na unda por haya informacion, refresca, ricibi guia y cumpra un recuerdo artesanal traha pa nos artesanonan di Aruba.
Palabra di gratitud pa e trabounan haci
Minister Maduro ta felicita Minister President sra. Evelyn Wever-Croes cu e bunita logro aki, cual ta un aporte importante pa preservacion di nos herencia natural y cultural. E mandatario ta gradici tambe na e Comision di Aruba Amenities, di cual Ministerio di Cultura tambe ta forma parti, cu ta trahando na un manera hopi efectivo riba mantencion y renobacion di nos Patrimonionan Historico, Natural y Cultural. “Mi ta deseanan hopi exito y animo den nan trabao ya cu tin hopi trabao pa haci. Tin mas patrimonio cu ta en espera di turno pa nan tambe haya un restauracion y mantencion pa asina nan por sirbi nos comunidad y bishitantenan como atraccionnan autentico di Aruba. Pabien na e bario di Ayo y Pabien na e Pueblo di Aruba,” tabata e gratitud expresa pa Minister Maduro durante e conferencia di prensa.
