Recientemente Minister Maduro di Cultura a aproba un suma di 270 mil florin extra pa UNOCA por financia proyectonan cultural. E suma aki UNOCA lo uza pa co-financia 27 proyecto riba diferente areanan cultural. Entre otro, un suma di 62.500 florin ta wordo aloca pa celebra nos tradicion di Dande den diferente barionan na Aruba y casi 40.000 florin ta bay pa enrikese nos coleccion literario nacional cu obranan nobo cu pronto lo sali riba mercado.
UNOCA tambe ta co-financia varios proyectonan cu ta cay bou arte di tarima, manera e obra musica ‘Grease’ e premio nacional Crioyo di Oro, Song Festival di Pasco di nos grandinan, como tambe brinda ayudo na grupo di Gaita Las Unicas Fabulosas den nan representacion di Aruba na Boneiro e fin di aña aki. E presentacion di fin di aña di Stichting Leerorkest y concierto di Edjean Semeleer ‘Euforia’ tambe lo ricibi sosten di UNOCA for di e fondo extra aki.
Otro proyectonan cu a logra haya co-financiamento cu e fondo aki ta proyectonan di Arte Visual, participacion di Artistanan local na Aruba Fashion Week, celebracion di Pasco den barionan di Aruba y dos documentario interesante y importante cu lo wordo estrena den e prome lunanan di 2025. Un proyecto cu a capta hopi atencion cu tambe por a wordo realisa danki na e sosten adicional aki, ta e exposion ‘Caha di Orgel: Tono di nos Tradicion’ cu a tuma luga dia 28 di november ultimo.
UNOCA ta sumamente contento cu e sosten adicional cu a ricibi di Ministerio di Cultura pa asina sigui inverti den cultura di Aruba. Den 2024 UNOCA a ricibi un total di 142 peticion, di cual total 98 a ricibi co-financiamento, incluyendo e suma adicional aki cu a keda aproba pa Minister Maduro di Cultura.