Minister Maduro di Cultura: Den un exposicion dedica na lasonan di Reino Hulandes cu Colombia tin 10 obheto cu ta conta un storia di Aruba

E exposicion ”20 Objetos: una historia de Aruba y Curazao” di sr. Joeri Oltheten na e Biblioteca Luis Ángel Arango na Bogota, ta contene 10 obheto cu cual un ciudadano di Aruba ta conta su historia. Pa Aruba sr. Renwick Heronimo di Fundacion Museo Arubano tabata encarga pa acerca e personanan y scoge e piesanan. Den e exposicion por aprecia e ‘Violin’ di Mo Tito di sra. Maybeline Arends-Croes, e ‘Staf Indjan’ di sr. Raymundo Dijkhoff, e ‘Carta pa Gezaghebber’ di sr. Peter Scholing, e ‘Teblachi di Spiel’ di sra. Olga van Bochove, e ‘Holoshi di Boto’ di sr. Clyde Harms, e ‘Boter di Bols’ di sr. Roy Feliciano, e ‘Lele’ di sra. Titi Tromp, e ‘Abacus’ di sra. Madel Jim, e ‘Casuela’ di sr. Atan Lee, y e ‘Carnival Head Piece’ di sra. Cherryldine Buckley. Via e sistema auditivo e bishitante di e exposicion por haya sa mas di cada piesa y riba panelnan grandi cu rondona e exposicion, por admira cada persona cu nan obheto preferi cu ta conta un storia di nos Pais. 

E exposicion a wordo organisa pa Embahada di Reino Hulandes na Colombia cu yudansa di Prins Bernard Cultuurfonds y ta inspira pa e exposicion ‘100 obheto’ di sr. Joeri Oltheten di Fundacion Wintertuin. E meta di e exposicion ta pa mustra e lasonan estrecho cu e Paisnan den Reino Hulandes tin cu Colombia. Minister Maduro di Cultura tabata invita pa Embahada di Reino Hulandes na Colombia pa asina haci apertura di e bunita exposicion aki cu ta wordo exhibi na Bogota, San Andres, Baranquilla y Medellin.