ORANJESTAD,Aruba
Comunicado Di Prensa
Diasabra anochi den presencia di miembronan di SMAC y di Cuerpo Policial, Minister Maduro di Cultura a sende e flambeu di Parada di Flambeu (Fakkel) pa asina duna inicio na Aruba su Carnaval 66.
E mandatario ta desea tur grupo y participante hopi exito den e temporada di Carnaval 66 y ta desea pa tur hende por goza sanamente. Minister Maduro ta gradici tur esnan cu ta haci e celebracion grandi aki di nos Cultura posibel y ta manda un palabra di gratitud y forza specialmente na SMAC, Cuerpo Policial, Ambulance, Rode Kruis, Serlimar, DOW, cosedonan, estilistanan, boluntarionan y tur otro persona cu nan trabou y esfuerso ta yuda engrandece nos Carnaval.
Aruba su Carnaval ta e exposicion Cultural mas grandi di nos Pais, un temporada di gozo pa Pueblo y tambe un temporada pa mustra nos bishitantenan con nos Pueblo ta celebra y biba nos cultura. Minister Maduro ta haci un apelacion pa nos comportacion civico sin exceso innecesario y cu atencion special na nos muchanan y hobennan durante e celebracion cultural aki cu ta wordo biba tambe pa nos bishitantenan. Ban hunto biba nos cultura y laga un bunita recuerdo di e celebracion di Aruba su Carnaval 66.
