Recientemente Minister Xiomara a reuni cu Representante Permanente di UNESCO pa Reino Hulandes sra. Monique van Daalen y Representante Suplente sra. Carlien Schrijvershof. Den e reunion di encuentro a elabora riba diferente puntonan di prioridad na Aruba, e rol di UNESCO den realisacion di puntonan di maneho di Gobierno, pakico colaboracion ta importante cu tur partners envolvi y e importancia di e trabounan di UNESCO.
Rol di UNESCO
Minister Maduro a subraya cu e importancia di UNESCO pasobra cu banda di trabou pa cultura, e organisacion tambe ta atende cu entre otro areanan social, sciencia, comunicacion y enseñansa. Pa trece e conocemento aki na un manera mas amplio den comunidad, e mandatario di cultura a splica e representantenan tocante e diferente iniciativa y programanan informativo realisa pa informa pueblo di e trabounan y rol di UNESCO Aruba. Banda di e rol di UNESCO, Minister Maduro a comparti cu sra. van Daalen y sra. Schrijvershof e logronan recien di UNESCO Aruba manera e 4 scolnan di UNESCO y e presidencia di MOWLAC en conexion cu trabounan riba e tereno di digitalisacion.
Trabounan na Aruba
Señora van Daalen a splica cu banda di e trabounan ya caba realisa na Aruba, un punto di enfoke di UNESCO ta e tema di arkeologia bou awa (onderwaterarcheologie) y tur locual ta relata na cultura bou di awa na Aruba. Ademas, e Representante Permanente di UNESCO pa Reino Hulandes tambe ta comparti e pensamento cu mirando e situacion financiero precario, ta importante pa establece prioridad y uni forsa. E representante a subraya cu e motto di Ministerio di Cultura” ‘Cultura, bo tin cu bib’e’, ta cuadra cu e filosofia di UNESCO. Van Daalen a enfatisa riba e importancia pa UNESCO traha den cooperacion estrecho y na un manera coordina cu Gobierno pa cu realisacion di maneho y su respectivo metanan.
Punto di enfoke na Aruba
Minister Maduro a elabora riba e diferente punto di atencion y temanan actual na Aruba manera identifica y establece ken nos ta como pueblo, conserva y promove nos idioma Papiamento, e compromiso di Gobierno na metanan sostenibel (SDG’s) y tambe
desaroyo riba tereno di sciencia y tecnologia den mundo di enseñansa manera e facultad di SISSTEM na Universidad di Aruba.
Tambe, e mandatario a splica cu pa cultura, e enfasis ta riba conservacion di nos herencia inmaterial. Minister Maduro a ilustra con den relacion di Reino, nos ta estableciendo hunto locual ta prioridad pa cada pais y pa cu esaki nos ta den proceso di structuracion. E digitalisacion di nos archivonan ta un ehempel. Minister Maduro a termina cu e pensamento cu banda di e pasado comparti cu nos tin den Reino, locual cu nos tin diferente tambe ta importante pasobra nos diversidad ta forma parti di nos forsa. Nos diversidad ta haci nos unico.