Recientemente Minister Maduro a reuni cu sra. Zulema Dabian-Erasmus, sr. Ady Thijsen y sr. Andy Lee kendenan ta representa Aruba na respectivamente na Washinghton y na Hulanda.
GevMinUSA
Sra. Zulema Dabian-Erasmus ta Aruba su Minister Plenipotenciario nobo na Washingthon DC. Pa Minister Maduro ta importante pa por conta cu e asistencia di Aruba su Minister Plenipotenciario na Washinghton (GevMinUSA) na momento cu ta atende IMF y World Bank su Spring y Annual Meetings. Ta importante pa nos GevMinUS ta bon informa tambe di tur locual ta e trabounan cu CARTAC, cu ta IMF su asistencia tecnico pa paisnan den Caribe, ta haci pa Aruba riba e tereno economico y financiero. Banda di esaki nos GevMinUSA ta yuda pa establece y mantene e lasonan cultural cu Aruba tin cu Merca, y ta yuda pa nos por keda den contacto cu e Arubianonan residencia na Merca. Minister Maduro ta desea nos GevMinUSA sra. Zulema Dabian-Erasmus hopi exito den su reto nobo na bienestar di Aruba.
GevMinNL
Minister Maduro a reuni fin di aña tambe cu Aruba su Gevolmachtigde Minister na Den Haag, sr. Ady Thijsen. Pa Minister di Finansa ta importante cu sr. Ady Thijsen como nos GevMinNL cu ta representa Aruba den Conseho di Minister di Reino, ta bon informa di tur e trabounan cu ta wordo haci principalmente pa por logra e stabilidad financiero di Aruba. Pa e motibo aki regularmente ta tene nos GevMinNL na altura di e desaroyonan, specialmente pa locual ta trata e supervision financiero di Aruba.
Staatsraad Aruba
E siman aki Minister Maduro a reuni cu sr. Andy Lee kende recientemente a keda apunta como Aruba su Staatsraad na Raad van State, cu ta e Colegio Halto di Reino Hulandes cu ta percura pa duna conseho na e Gobiernonan den Reino. Ta importante pa Aruba su Staatsraad tambe ta bon na altura di tur locual ta e esfuersonan cu ta wordo haci pa recupera Aruba su credibilidad financiero y tambe stabilisa e finansa publico di nos Pais. Ta importante pa na Hulanda e instancianan cu ta tuma desicion y ta brinda conseho tin un bista real di e situacion financiero di Aruba, y pesey ta nos trabou pa e informacion aki yega na e manera formal y informal. Minister Maduro ta desea sr. Andy Lee hopi exito como nos Staatsraad na Den Haag.
