Bishitanan Escolar ta sigui en conexion cu Dia di Betico
Riba diamars a sigui e bishitanan escolar di Minister di Cultura, Xiomara Maduro, caminda cu e dia aki ela bishita St. Dominicus College y St. Rosa College, e biaha aki di scol basico, pa asina combersa cu nos muchanan tocante kende tabata Betico Croes, dicon ta importante pa celebra su fecha natal y tambe kico e dia aki ta significa pa nos Pais.
E mainta a cuminsa na St. Dominicus College caminda cu riba e speelplaats, tur mucha a uni hunto pa asina duna Minister Maduro un caluroso bonbini. Aki e mandatario a combersa cu e muchanan riba kende tabata Betico Croes, a splicanan riba locual nos Libertador a haci pa Aruba y tambe a informanan di e actividadnan cu tin pa haci riba e dia aki pa asina celebra su fecha natal.
Despues di e bishita aki, Minister Maduro a sigui pa St. Rosa College unda e muchanan tabata sumamente entusiasma pa ricibi e mandatario. Aki, e mandatario a wordo ricibi cu musica, banderin y algun bisti na trahe tipico di Aruba. Minister Maduro a pasa un rato ameno combersando cu tur e muchanan y a contanan un poco mas di Betico Croes y e importancia di celebra e dia aki. E mandatario a finalisa su bishita den klas 6 unda cu e por a admira un exposicion crea pa e muchanan di klas 6-A y 6-B unda cu nan a compila mas informacion di nos Libertador Betico Croes y a exhibi esaki durante su bishita.
Minister Maduro ta gradici cabesante, docente, staff y personal di St. Dominicus College y St. Rosa College pa e bunita ricibimento cu ela haya na ambos scol caminda cu ela pasa un mainta ameno combersando cu esnan di mas chikito den nos comunidad.
