Minister Armando (Rudy) Lampe a tuma nota cu den e campaña di vacunacion rond mundo y na Aruba tin hopi discusion. Pero tambe a sigui e division den opinion cu tin bou di cientificonan riba e desaroyo di vacuna pero tambe su uzo.
Como Minister di Ciencia, esaki ta un tema cu e ta sigui hopi di cerca. “Den e comunidad cientifico tin division di opinion riba e vacuna di COVID-19.” E ta bisa cu awo den e discusion cu tin den comunidad cientifico, tin grupo ta bisa cu e vacuna ta funciona y otronan no ta comparti e pensamento. Ciencia ta funciona asina, ta acepta loke e mayoria den comunidad cientifico ta acepta como mas plausibel. Pero e opinion contrario di un minoria por bira mas dilanti e opinion di e mayoria di e comunidad cientifico, e ora e berdad cientifico ta bira e opinion cu e minoria a sostene algun tempo prome.
Mester tene cuenta cu ta den un fase experimental cu e vacuna aki. Pa desaroya un vacuna normalmente ta dura dies te 15 aña y den investigacionnan medico, e cantidad di añanan ta conta pa sa ki efecto un remedi tin. Esaki ta e diferencia di ciencia medico cu otro tipo di ciencianan. “Mi ta un cientifico social y nos metodonan ta completamente diferente cu esnan medico cu mester di hopi tempo pa haya un resultado cu ta aceptabel pa e comunidad cientifico. Pues e vacuna aki ainda ta den un fase experimental.”
E mandatario a bisa cu e mes ta dispuesto pa tuma e vacuna pa motibonan cientifico, pasobra un vacuna mester di mas hopi hende pa yega na un conclusion cientifico, haya resultado pa demostra cu e ta funciona. Sernan humano tin e capacidad pa haci sacrificio contra su interes personal. “Mi ta dispuesto pa haci un sacrificio pa e investigacion cientifico pa e por bay dilanti.”
El a splica cu e no a tuma e vacuna ainda apesar cu e tin mas cu 60 aña, pasobra tin hopi frontliners y no tin hopi vacuna ainda, y e ta dispuesto pa sacrifica pa otronan haya e chens.
El a bisa tambe cu no mester kere cu e vacuna aki ta salbacion pa Aruba ni pa mundo. Tin hopi variante ta surgi di coronavirus. E virus ta evoluciona, mescos bida a evoluciona. Ta premira cu den su evolucion e lo bira menos peligroso. El a duna e ehempel di e griepprik cu mester tum’e tur aña y esey lo sosode cu esun di COVID tambe despues di e fase experimental. Cada aña e vacuna aki mester wordo adapta, debi na e variantenan. “Den historia a keda demostra cu tin vacunanan a resulta un bendicion pa humanidad, manera esun contra polio. Ta cientificonan a desaroya esaki y a dura casi 30 aña pa por a yega na loke tin awo. Casi e malesa di polio no ta existi mas. Un vacuna realmente por ta un bendicion pa mundo, manera historia a demostra caba.
No mester cay den e ilusion cu e vacuna aki ta bay salba nos economia y mundo. E variantenan t’ey y cada aña probablemente mester bay tuma un vacuna. E pandemia aki ta global y a bira endemico, pues el a bin pa keda. Mundo no ta liber di COVID mas, mescos a sosode cu Spanish Flu of Russian Flu cu t’ey ainda pero a bira menos mortal. Mester prepara nos mes cu nos ta bay biba den un mundo di COVID. Mester saca les di e situacion, pa cambia nos forma di biba, cambia nos economia pa no depende di turismo so,” Lampe a expresa.
Pa cambia y adapta na e normal nobo, mester bay desaroya industria di agricultura, di cannabis y crea otro pilarnan economico. “Esey nos tin cu siña di loke nos ta pasando aden.
