ORANJESTAD, Aruba
Desde augustus 2019 cu Bureau Traimerdia ta resorta bou di Minister Glenbert Croes. For di e tempo ey a bin ta traha incansablemente riba mehoracion y ampliacion di servicio di Traimerdia.
E instancia aki ta cardinal pa cuido y siguridad di nos muchanan. Traimerdia ta duna guia y ‘opvang’ na hopi mucha aki na Aruba. Tempo cu el a bin resorta bou di Ministerio di Asunto Social y Labor tabatin un lista di espera 500+. Esaki a keda reduci na 197 ainda riba e lista.
Si na augustus 2019 Traimerdia tabata atende alrededor di +/-1100 mucha. Pa e aña escolar 2020/2021 Traimerdia a amplia su infrastructura ofreciendo cuido y guia na +/-1400 mucha. Di un total di 43 klas, a amplia e localidadnan na 68 klas. Y e meta ta pa por ofrece cuido y guia na tur e muchanan cu ta desea di atende Traimerdia. Minister Glenbert Croes su meta ta pa ningun mucha keda atras. Su meta ta, pa di parti di Gobierno, ofrece tur alternativa posibel cu ta ofrece siguridad na nos muchanan.
Desde 16 di augustus 2019 pa awo Bureau Traimerdia a conoce e siguiente avansenan:
- Traslado di e scolnan di SKOA pa scolnan di DPS entrante aña escolar 2020-2021
- Ampliacion di cantidad di localidadnan di 43 klas pa 68 klas.
- A haya adicionalmente diferente scolnan di DPS pa fungi como centro nobo di Traimerdia
- A haya 2 klas na Scol Dornasol na Sabana Basora pa muchanan special cu opcion di amplia cu mas klas
- Ta renobando tur e trailernan di Traimerdia
- Traimerdia San Nicolas ta hayando pa aña escolar 2020 – 2021 un trailer nobo despues cu e trailer di San Nicolas aña pasa a bira victima di incendio di vandalismo.
- Hunto cu DRH ta repasando e ‘rechtspositie’ di e trahadonan di Bureau Traimerdia (BTM)
- A tene reunionnan cu e sindicatonan Topa y Seppa ariba diferente topiconan di BTM
- A tene reunionnan cu e lidernan conhunto como tambe individualmente
Tin avansenan tumando lugar, algun cu pasonan grandi, otro cu pasonan mas reserva, pero tur den e mesun direccion y cu e mesun meta esta di trece e miho cuido y guia pa mas hopi mucha cu ta posibel cu e servicio cu Bureau Traimerdia ta ofrece na un prijs social pa un y tur.
