E no ta un secreto cu na januari 2022 ora cu EpE a bin resorta bek bou di Ministerio di Labor, unda cu semper el a resorta desde su fundacion na aña 1986, a bin encontra un EpE hopi debilita, despues di 36 aña di existencia.
Minister Glenbert Croes, un biaha mas ta reteira su reconocimento na FEPA y e 4 empleadonan di EpE cu a keda kere den EpE y a haci tur loke ta na nan alcanse, riba forsa y esfuerso propio, pa mantene EpE habri.
Nos a bin encontra un EpE sin telefon y sin internet. Wayanan di instalacion di IT, internet y telefon corta. Un EpE sin su inboedel cual a wordo regala na un cantidad di scolnan lagando EpE sin nada. Danki na FEPA cu a haci inversion den EpE, segun su forsa tambe, cu e departamento aki por a keda existi bou condicionnan hopi limita.
Awo 4 luna despues, nos tin un Enseñansa pa Empleo reenforsa, contando cu e total apoyo di Minister Glenbert Croes y su bureau. Mientras tanto nos a logra pa EpE por haya su telefon bek den servicio nr. 5825662. Tambe nos a logra reactiva y actualisa e website cu ta www.epearuba.com. Ainda nos ta purbando pa recobra e pagina di Facebook. Pa cu esaki nos ta den proceso cu nos departamento huridico pa conseha nos. Tambe nos a logra pa EpE por haya su POS bek pa cursistanan por haci pago cu ATM. IT di Bureau conhuntamente cu otro coleganan a reinstala tur computer y tambe ta percurando pa e infrastructura pa por reconecta EpE bek riba internet.
Djis pa duna un ehempel di mas avansenan tumando luga, si na 2021 EpE a genera AWG 2925,- na cursonan ofreci, ya den e prome 4 lunanan di aña 2022, desde cu e ta resorta bou di Minister Glenbert Croes, EpE a genera un total di AWG 82.373,02 na cursonan ofreci.
Cu pasonan lento pero aplastante ta hibando EpE e proximo nivel. E departamento cu ta crucial pa recapacitacion di nos hendenan conforme e demandanan nobo di nos mercado laboral.
