ORANJESTAD,Aruba
COMUNICADO DI PRENSA
Despues di parada di flambeu, algun potret di mucha chikito a circula kendenan tambe tabata presente na dicho parada te den oranan laat di anochi.
Esaki a causa consternacion den nos comunidad pa motibo cu e hecho aki tambe por ser categorisa como un tipo di abuso di mucha. Abuso no solamente mester ta sexual y/of fisico. Negligencia tambe ta un sorto di abuso. Exposicion di nos muchanan na vicio di droga y alcohol tambe ta abuso. Expone nan oidonan fragil na musica duro por tin daño permanente pa nan oido, tambe ta un abuso. Y asina por sigui menciona mas.
Diabierna ultimo Minister Glenbert Croes conhuntamente cu Minister di Husticia Sr. Andin Bikker, a reuni cu algun stakeholder cardinal manera Bureau Sostenemi, Directie Voogdijraad, Wit Gele Kruis, Opvoedcommissie, KPA, DWJZ, Departamento di Asunto Social y Sociaal Crisisplan.
SCP proactivamente a presenta un campaña di conscientisacion na Gobierno di Aruba cu tin como meta mustra e mayornan riba nan responsabilidad.
E siman a habri cu presentacion di e plan aki na comunidad di Aruba atrabes di e rueda di prensa semanal di Gobierno di Aruba.
E mandatario di su banda a haci un apelacion na tur mayor, na tur adulto cu ta den bida di un criatura, mescos cu ta tuma un comunidad pa lanta un mucha, ta responsabilidad di e comunidad pa cuida y proteha e criatura. Unda cu un mayor ta faya, e otro mester cay aden. Si ta ambos ta faya, abuelonan mester cay aden y asina por sigui. Pero e network social di e mucha mester ta activo pa bienestar y proteccion di nos muchanan.
Y unda no tin esaki ta Gobierno su deber pa percura pa proteccion di nos criaturanan.
“Ban cuida nos muchanan den temporada di Carnaval. Hunto cu mi Colega Ministro di Husticia y mi persona nos ta trahando hunto cu e Team y Partners di e Crisis Plan Social pa nos cuida y protega nos muchanan durante e temporada di Carnaval. E siguridad di nos muchanan ta responsabilidad di NOS TUR”, e mandatario ta termina bisando.
