Den nomber di Gobierno di Aruba y den mi capacidad di Minister President, mi ta informa e renuncia di Minister di Labor, Integracion y Energia Sr. Glenbert Croes.
Señor Glenbert Croes mes a tuma e desicion aki pa retira di su posicion pa motibo di ta wordo considera un sospechoso den e investigacion di e caso Portulaca. Ademas den Partido MEP y den gobernacion actual tin principio y regla, cu si un Minister of miembro di Parlamento den funcion bira un sospechoso den un caso, cu e lo tuma su retiro inmediatamente pa asina garantisa transparencia y permiti cu e proceso legal sigui sin obstruccion.
Gobierno di Aruba ta gradici Minister Glenbert Croes pa su servicio y pa su cooperacion brinda durante nos periodo di gobernacion. Nos ta desea Glenbert Croes su famia y su sostenedornan hopi forsa. Tur trabao pendiente di su ministerio lo bay wordo atendi sin interupcion pa un colega minister. Mas despues lo anuncia cua Minister lo tuma over e carteranan concerni.
Gobierno di Aruba ta keda comprometi cu integridad y responsabilidad, pa asina mantene y fortalece e confiansa cu pueblo di Aruba a brinda nos gobernacion. Nos ta gradici pueblo pa su comprension den e momentonan aki y ta priminti di mantene comunidad informa di cualkier desaroyo relevante den e caso aki”, Prome Minister Evelyn Wever-Croes a expresa.
