Minister di enseñansa Endy Croes tambe tabata presente na e anochi di graduacion di Xavier University School of Medicine pa e mandatario ta un satisfaccion pa di dos biaha ta para pa felicita un cantidad grandi di studiante cu a termina nan estudio como medico.
Gobierno di Aruba ta felicita Xavier University School of Medicine cu nan logro pero tambe cu nan di dos parti di nan proyecto como scol di medicina na Aruba cu lo start e aña aki y lo termina den 2024. Por bisa cu ta un edificio cu mas klasnan nobo y un auditorio completo. Tambe Xavier University School of Medicine lo duna dos full scholarship e anja escolar nobo. Minister di enseñansa ta gradici y bisa danki na henter e gerencia di Xavier University School of Medicine pa a kere den Aruba.
Minister di enseñansa Endy Croes ta sumamante contento cu tur e graduadonan cu nan logro unda cu nan a siña duro, pasa den training duro , pero e mandatario ta kere firmemente cu trabaonan duro ta crea miho studiantenan pa futuro.
Awe por bisa cu nan ta dokternan capacita y cu nan lo cuminsa cu capitulo nobo den nan bida como dokter. Sinembargo drentando den e mundo di dokter ta un mundo cu hopi reto , pero na mes momento e ta un bunita trabao pa eherce. E confiansa cu e comunidad lo crea rond di bo como studiante ta pone cu bo lo tin hopi mas responsabilidad.
Segun e mandatario e pashent lo duna bo su confiansa y ta keda na abo como dokter pa duna e miho servicio y trato na bo pashentnan y cu bo pasenshi lo determina bo futuro. Minister Endy Croes a vocifera cu e trabao cu nan a scoge pa tin awe ta un bunita trabao pero cu hopi responsabilidad y tin tur e confiansa cu nan ta bon prepara pa duna e miho di nan na tur e pashent nan cu nan lo haya den futuro. Un pabien na tur studiante cu a gradua di Xavier University School of Medicine y ta desea nan tur cos bon y exito den nan futuro trabao.
