Diaranson mainta, Minister di Enseñansa y Deporte Endy Croes hunto cu Prome Minister Evelyn Wever-Croes a ricibi bishita di Sra. Joselyne Oduber-Jacobs cu a cumpli 43 den enseñansa di Aruba. Durante e encuentro, Minister Endy Croes a entrega Sra. Joselyne un Reconocemento di Gratitud y Aprecio den nomber di Gobierno di Aruba pa su dedidacion y profesionalismo durante 43 aña den enseñansa special. Sra. Joselyne a traha como maestra desde aña 1980 na Emma School den diferente klas, entre otro, klas 1, 3, 5 y 7. Na aña 1992 Sra. Joselyne a bira cabesante suplente di Emma School y desde e tempo ey a cuminsa traha den e area di structura di cuido di e scol. Desde aña 2004 Sra. Joselyne a traha como cabesante di Emma School y e aña aki a baha cu pensioen. Sra. Joselyne ta un juffrouw cu a traha hopi pa e desaroyo di e scol y di e muchanan den su totalidad. Sra. Joselyne a indica cu e mucha ta central y mester percura pa nan haya e prioridad. Como cabesante di scol Sra. Joselyne a dirigi mas riba e alumnonan y nan necesidad pa nan a logra exitosamente den nan siñamento. Sra. Joselyne tabata un cabesante envolvi den e asuntonan di e alumnonan y a contribui enormemente den nan desaroyo social emocional. Minister Endy Croes ta felicita Sra. Joselyne pa e tremendo trabou cu el a haci y su contribucion, aporte, dedidacion y amor den enseñansa di Aruba durante 43 aña, alabes e mandatario di Enseñansa ta desea juffrouw Joselyne pa disfruta di su pensioen bon mereci.
