Recientemente, durante e di shete edicion di Fiesta Tipico den Bario organisa pa Union di Tipiconan Rubiano a reconoce dos Baluarte Cultural di e districto di Noord pa nan gran aporte y contribucion pa yuda mantene y promove nos muscia cultural. Sr. Chonai Faro y Sr. Nelson Sprok a ricibi un bunita homenahe y reconocemento e anochi aki. Minister Endy Croes y colega Minister Xiomara Maduro tabata presente na e ocasion special aki.
Sr. Chonai Faro
Sr. Isnardo Epifanio Faro “Chonai” a nace dia 22 di maart 1945 y ta di e bario di Sabana Liber. Dia 17 di april di e aña aki el a cumpli 50 aña casa cu Sra. Petra Faro de Cuba, di cual matrimonio a haya 2 yiu homber Jorge y Isnardo, 4 nieta, 5 nieto y 1 bisanieto.
Sr. Faro pa 35 aña a fungi como maestro di scol. Ademas Sr. Faro tin mas di 55 aña como miembro fiel di e coro di Misa di Santa Anna. Banda di koor di misa di Noord, Chonai a yega di canta den varios coro na Aruba y e ta fundado di basta agrupacion y di e banda musical ‘La Selecta’ un banda conoci den comunidad, unda cu hopi musico- y artista local y internacional a debuta. Tambe, Sr. Faro ta forma parti di Tipico Arco Iris, Tico y sus Estrellas, Patan Farro and Friends y Tommy Figaroa and Friends. Sr. Faro a cuminsa hopi aña pasa cu aguinaldo Bicentenial di Noord y a forma parti di Campanitas Navideñas, Gaiteros del Norte, Maruba y Katatumbo. Chonai a yuda varios organisacion manera grupo Flor di Bini Bini, Festival di Voz y Landia Escolar.
Sr. Nelson Sprok
Sr. Nelson Florencio Sprok a nace dia 28 di october 1939 na Curaçao. Na un edad hopi jong el a residencia na Aruba. Dia 30 di october 1967, Nelson a drenta enlace matrimonial cu Sra. Lucia Tromp. Recientemente nan a caba di cumpli 56 aña di bida matrimonial. Nan tin 4 yiu: Nelson, Jose, Khys y Luskys, 3 nieto, 2 nieta, 2 bisanieto y un bisanieta. Cu hopi trabou y esfuerso, Nelson a logra lanta su mes un compania conoci bou di e nomber: CONAR NV. Dia 14 di juli 1970, e compania a cumpli 53 aña di existencia dunando servicio na comunidad di Aruba y a traha den varios proyecto grandi pa Aruba. Tambe, Sr. Sprok a dedica y coopera pa hopi aña na Carnaval di Mucha na Noord. Sr. Sprok tabatin un pasion pa folklore y a dicidi di rescata y yuda mantene nos musica tradicional bibo. Sr. Sprok a cuminsa train na cas y asina pocopoco a cuminsa toca na diferente evento y actividad, entre otro, cas di famia, pa gruponan di baile den nan shownan, pa actividad di nos grandinan na Huize Maristella, Paviljoen na Oranjestad y Verpleegtehuis na San Nicolas. Ademas di presenta na misa, misanan di aurora y Bonbini Festival. Sr. Sprok a yuda y educa nos muchanan cu proyecto di scol y cu informacion di nos musica di Caha di Orgel. Sr. Nelson Sprok a promove cu hopi dedicacion y pasion nos musica di Caha di Orgel. Por ultimo, Minister Endy Croes ta felicita Sr. Chonai Faro y Sr. Nelson Sprok pa nan contribucion pa mantene y promove nos cultura. Tambe, e mandatario di Enseñansa y Deporte ta gradici Fundacion Union di Tipiconan Rubiano y colega Minister Xiomara Maduro cu e bunita iniciativa aki pa asina sigui mantene nos cultura di musica tipico bibo.
