Diaranson mainta banda di veld di DOUANE na Dakota a tuma luga ponemento di prome piedra pa e edificio nobo pa Stichting Hunto.
Kico Stichting Hunto ta encera?
A trece tanto FMAA (Fundacion pa Maneho di Adiccion di Aruba) y SPD (Sociaal Psychiatrische Dienst) bou un solo dak cual lo bay carga e nomber di Stichting HUNTO. Hopi biaha ciudadanonan cu adiccion tin problema cu ‘mental health’ tambe conoci como ‘dubbel diagnostiek’. Stichting HUNTO lo tin tur profesional di adiccion y ‘psychiatrie’ bou di un solo dak alabes lo tin un ekipo specialisa pa mucha. Pues ora mayor yega cu un mucha of adicto ambulante cu kier busca ayudo, e tey pa yuda un y tur mesora. Esaki ta e ayudo conoci tambe como e ‘eerste lijn’. Esaki ta complementa y yuda baha e di e lista di espera y lo reduci e presion riba e ayudo mas specialisa manera (RESPALDO). Manera profesionalnan a splica nan a warda alrededor di 25 aña pa por mira un soño wordo realisa. E logra aki ta garantisa cu lo brinda e ayudo hopi mas lihe y eficiente.
Minister Rocco Tjon:
Minister Rocco Tjon banda di a gradici Prome Minister Evelyn Wever – Croes, Gabinete Wever Croes I y II y su Colega Danqui Oduber kende a inicia e proceso desde 2019, tambe a gradici masha hopi e ‘stuurgroep’, ‘stakeholders’ y e profesionalnan den e veld cu a forma parti di e proceso pa planea y yega na e consenso aki. Entre otro SPD, FADA, RESPALDO, HAVA, Sociale Zaken, DVG, CBOS, BOV, Stichting Eliezer Aruba a hunga un papel cardinal. Mas cu claro e mision ta pa percura pa e cliente por rehabilita y re-integra bek den comunidad. Minister di Enseñansa y Deporte ta felicita colega Minister Rocco Tjon, Danqui Oduber, Glenbert Croes y Gabinete completo pa cu e logro bunita aki. Pabien FMAA y SPD unda desde awo pa dilanti ta UNI forsa bou di e nomber Stichting HUNTO pa un solo causa pa brinda ayudo na esnan den necesidad manteniendo e cliente central. Masha masha pabien. Union ta haci forsa!
