En conexion cu dia Mundial di conscientisacion di autismo a ilumina bestuurskantoor cu luznan blauw
April ta luna di conscientisacion di autismo, pa cu esaki Gobierno di Aruba hunto cu Fundacion Autismo Aruba (FAA) a uni na e causa special aki y diasabra ultimo a ilumina bestuurskantoor cu luznan blauw, hunto cu coleganan Prome Minister di Aruba Evelyn Wever – Croes y Minister di Husticia Rocco Tjon.
Minister Endy Croes a expresa cu tabata un bunita ceremonia cu a inicia cu Prome Minister Evelyn Wever-Croes y Presidente di FAA señora Carolina Thiel-Span cu a presenta un bon discurso compartiendo bunita mensahe cu tur presente pa cu e ocasion special aki. Despues a sigui pa presentacionnan di dos hoben cu autismo; Kay Quandus a declama un excelente poesia cu palabranan bon scogi y Byron Lesire a introduci su mes y su retonan como un mucha cu autismo, ambos hobennan talentoso cu autismo.
Nacionnan Uni den nan reunion anual pa e dia di Autismo ta adresa e topico di enseñansa inclusivo y di calidad pa un y tur den e contexto cu esaki ta describi den e ‘Sustainable Development Goal 4’ – esaki ta e meta di desaroyo sostenibel di Nacionnan Uni cu ta enfoca riba enseñansa. Gobierno di Aruba ta trahando den ekipo cu expertonan den diferente ramo pa percura pa Aruba tambe yega na realisacion di e ideal di e SDGs y hunto cu partnernan den enseñansa Gobierno ta trahando duro pa provee enseñansa di calidad y haci esaki inclusivo y accesibel pa un y tur. Gobierno ta sostene e proyecto di intervencion trempan pa muchanan cu entre otro Autismo. E proyecto ta percura pa muchanan di un edad jong ta ser evalua pa nan desaroyo y asina haya e apoyo den e areanan necesario pa por tin un desaroyo positivo.
Minister Endy Croes ta gradici Fundacion Autismo Aruba (FAA) pe tremendo trabou cu nan ta haciendo y tambe na mayornan. Masha danki pa boso esfuerso y dedicacion.