Siman pasa, Minister Endy Croes hunto Sr. Juni Faro di Ministerio di Deporte a reuni cu Sra. Ronella Croes, Sra. Tita Iglesias y Sr. Patrick Melchoir di Aruba Tourism Authority (ATA). Durante e reunion a trata diferente punto di interes y e proyecto Sport Tourism. Pa e proyecto aki ATA, Lotto pa Deporte y Gobierno di Aruba lo traha di cerca pa asina duna contenido real na e vision di turismo deportivo (sport tourism) na Aruba pa aña 2024. E deseo y vision di Minister Endy Croes ta pa dos (2) bes pa aña organisa un campeonato internacional na Aruba. Tin un comision cu lo scoge e eventonan deportivo cu lo tuma luga den “low season”, esta den e luna di mei, september y/of october. ATA, Lotto pa Deporte y Gobierno di Aruba lo aloca e fondonan necesario pa asina realisa e proyecto aki dos (2) bes pa aña. Durante e encuentro a trata e prome dos (2) eventonan deportivo pa aña 2024. Un di e eventonan deportivo cu tin hopi interes ta tuma luga fin di october y/of november di aña 2024, unda cu Seleccion di Hulanda ta competi den e torneo internacional Premier 12. Den e torneo internacional aki e 12 miho ekiponan di WBSC lo bataya contra otro pa conkista e titulo maximo. Manera ta conoci, cada cuater (4) aña tin e World Classic y cada dos (2) aña tin e campeonato unda cu e 12 miho ekiponan lo hunga un serie hopi popular contra otro. Seis ekipo ta cuminsa hunga na Mexico y seis ekipo lo hunga na Taiwan y e ekiponan ganado lo enfrenta otro den e final. Seleccion di Hulanda ta forma parti di e 12 ekiponan aki. Na luna di januari via “loting” ta determina unda Seleccion di Hulanda ta hunga, sea Mexico of Taiwan. Prome cu ekipo di Hulanda sali pa competi den e campeonato internacional aki, nan lo bin Aruba pa hunga tres (3) wega. Lo prepara e ekiponan y lo invita ekiponan di afo pa bin hunga contra Seleccion di Hulanda aki na Aruba, pa asina nan por prepara debidamente prome cu nan drenta den e torneo. Adicionalmente, tin un otro proyecto pa luna di september, den e lunanan nos dilanti lo elabora mas riba dje. Tambe Minister Endy Croes a elabora riba e proyecto di “Sport and Event Management” cu lo inicia na luna di maart proximo. Recientemente, den luna di november Minister Endy Croes a firma un acuerdo cu University of South Carolina unda cu e curso di Sport & Event Management lo inicia riba e nivel di “Master’s”. Un total di dies (10) persona tin e oportunidad pa sigui e curso aki y na final lo ricibi un certificado. E team aki den futuro lo yuda tur organisacion na Aruba cu bin na remacra pa organisa un evento internacional. Tres y/of cuater di e personanan aki lo forma parti di e organisacion pa yuda organisa evento riba plataforma internacional. ATA tambe lo delibera pa manda posibel cantidato. Pa conclui, un bon reunion y Minister Endy Croes ta contento cu pronto lo mira fruto positivo di e reunion aki.
Minister Endy Croes a reuni cu ATA unda a trata e proyecto di sport tourism
