Diaranson atardi, durante Conferencia di Prensa di Gobierno di Aruba, Minister Endy Croes a papia tocante e conferencia anual di Enseñansa, Cultura y Ciencia entre e 4 paisnan di Reino Hulandes cu a tuma luga dia 15 pa 17 di januari 2023 na Curaçao. Minister Endy Croes a gradici Ministernan di Enseñansa di reino, esta Minister di Enseñansa di Curaçao, sr. Sithree van Heydoorn, Minister di Enseñansa di Sint Maarten, sr. Rodolphe Samuel y Minister di Enseñansa di Hulanda, sr. Robbert Dijkgraaf pa nan energia y esfuerso durante e conferencia. Minister di Enseñansa di Hulanda Sr. Robbert Dijkgraaf ta na e isla pa prome biaha y tambe tabata presente durante e conferencia di prensa. Minister Endy Croes a elabora riba diestres (13) topico di importancia den agenda cu a trata durante e conferencia na Curaçao. Director di Inspeccion di Enseñansa di Hulanda, sr. Erik Martijnse a pasa door di e Doorlichting Rapport di Aruba, Curaçao y Sint Maarten durante e conferencia entre e Ministernan di Reino Hulandes. Den e Doorlichting Rapport tin diestres (13) recomendacion cu e meta pa mehora e calidad di enseñansa en general di e islanan y pa tin un miho aliniacion entre enseñansa y mercado laboral. Tambe a papia di Studiesucces, cual ta un proyecto bunita cu ta trahando riba dje pa e studiantenan Caribense. Na september 2022 tabatin un conferencia na Universidad di Aruba, unda cu e 6 islanan y Hulanda a participa. Durante e encuentro aki a firma un conclusion final y a bin cu un comision pa traha riba e proyecto aki. Minister Robbert Dijkgraaf tambe a elabora brevemente riba e proyecto Studiesucces. Segun varios investigacion ta indica cu e studiantenan di Caribe cu ta sigui studia na Hulanda ta enfrenta diferente barera. Pa e motibo aki, e Ministernan di Enseñansa di Aruba, Curaçao, Sint Maarten y Hulanda ta desea di introduci “Caribbean Academic Orientation Year”, pa prepara e studiantenan di Caribe miho pa e estudio di Enseñansa Superior (HBO) y/of universidad. Finalmente, Minister Endy Croes ta termina bisando cu e relacion entre e paisnan di Reino Hulandes ta hopi bon y cu mester probecha di e oportunidad aki pa mehora e colaboracion den ekipo.
