Dialuna mainta Minister di Turismo y Salud Publico sr. Dangui Oduber
a atende e celebracion di 25 aña di existencia di e centro di cuido di herida na Horacio
Oduber Hospital (HOH). E departamento a demostra di ta un centro di speranza y
sanamento pa cada un cuidadano di Aruba.
Minister Dangui Oduber ta orguyoso cu tin un centro di cuido di herida avansa cu ta
brinda un nivel halto di cuido. E comunidad di Aruba ta ricibi e miho cuido ora ta trata di
heridanan, di esun di mas simpel te cu e heridanan cronico y complica. Como Minister
di Salud Publico, Sr. Oduber tin tur e confiansa den e expertisio di Aruba su
profesionalnan y di capabilidad di duna cuido den nos region.
E vision di ministerio di salud ta pa por sigui brinda tratamento, no solamente na nos
comunidad, pero tambe na e cuidadanonan di e otro islanan den Caribe Hulandes.
Esaki lo aporta alaves na Aruba su turismo medico. Hopi di e pashentnan cu mester
trata herida ta personanan cu ta sufri di diabetes, esaki hopi biaha ta bin door di sobre
peso. Pa es motibo Minister Dangui Oduber ta keda enfoca riba e plan nacional di
prevencion pa sigui conscientisa y informa e comunidad pa hiba un bida mas saludabel.
Pa finalisa, Minister Dangui Oduber ta gradici e personal di hospital specialmente e
doctornan, enfermeranan y personal cu a mustra un compromiso di semper pone e
pashent central y pa asegura e miho cuido posibel. Ta pa remarca cu e exito no tabata
posibel sin e dedicacion y trabou duro di e ekipo exeptional di wondenpoli na HOH.
Pabien un biaha mas y danki pa alivia e dolor di miles di pashent na Aruba.
