Dialuna mainta Minister di Turismo y Salud Publico sr. Dangui Oduber hunto cu Minister di Transporte, Integridad, Naturalesa y Asuntonan di Adulto Mayor, sr. Ursell Arends a reuni cu Aruba Tourism Authority y e representantenan di e “Division Destination Development” cu e compania PKF Global. Un reunion unda a papia ariba un estudio pa atrea yatenan luhoso na Aruba.
Un estudio di “Luxury Cruise Market” lo wordo haci pa asina por analisa e strategianan di turismo y e potencial turistico di Aruba. Durante e reunion topiconan di discusion tabata entre otro: tournan mas exclusivo pa atende e mercado aki di turista, con pa promove Aruba su cultura y autenticidad, explora e mercado Europeo pa atrea mas diversificacion den nos mercado di turismo y por ultimo explora posibilidadnan di un area of port mas priva y exclusivo pa e mercado aki.
E estudio aki lo wordo finalisa na Maart 2024. A usa e concepto di “High Value, Low Impact Tourism Model pa asina por por analisa e mercado specifico aki. Aruba su forsa ta su hendenan y e hospitalidad cu ta wordo ofreci na nos bishitantenan, alaves un punto positive ta cu nos pais ta pafo di e area di horcan, nos tin un infrastructura stabil pa e sectore aereo y crucero y nos ta ofrece un variedad di hotelnan luhoso ariba nos isla.
Minister Dangui Oduber ta indica cu estudionan asina ta importante pa evalua y conseha tocante un mercado nobo pa e topico di atrea mas yatenan luhoso pa Aruba. E vision di Minister Oduber pa atrea turistanan di calidad cu ta bin gasta hopi sen den nos economia.
Minister Oduber ta expresa su gratitud pa e bishita di e representatenan di PKF y ta spera cu pronto por anuncia e resultadonan di e estudio aki.
