Minister di Turismo y Salud Publico, sr. Dangui Oduber conhunto cu CEO di APA sr. Marc Figaroa, a reuni pa discuti e masterplan di Aruba Ports Authority N.V. (APA) pa loke ta e proyecto di “Cruise Experience Development Plan” den progreso pa 2025.
Minister Oduber a duna di conoce cu den e Masterplan di APA ta inclui un inversion grandi pa e reconstruccion di e cruise terminal nobo pa Aruba. E proyectonan aki sigur lo bay crea oportunidadnan nobo, crea cuponan di trabou y lo bay trece mas entrada pa asina por sigui inverti den nos turismo. Alaves esaki lo yuda pa tin un miho facilidad cu e turista por disfruta di dje y lo mehora e experiencia di e turistanan crucero.
Aruba Ports Authority a manda busca un consultante pa crea un diseño pa e Aruba Cruise Port nobo. E consultante aki ta renombra pa su “Brand & Experience Design” cu ta conoci di e “Disney brand” y tambe ta un experto den Port and Destination Development enfocando tambe riba e parti experimental di e turistanan crucero. E motibo di bishita pa e consultante tabata pa por a conoce e cruise port di Aruba y henter e area pa asina por evalua tur aspecto di e proyecto manera servicio, comercial, seguridad di trafico y logistica. Tambe a reuni cu un grupo selecta di e cruise port community y stakeholders pa por a ricibi informacion y diferente perspectiva di e proyecto aki.
Minister Oduber ta contento cu e gerencia di APA cu progreso di e masterplan pa asina keda ariba e mesun liña di pensamento y ta mira APA cu un potencial enorme, e ta instrumental pa tur e desaroyonan economico cu ta na caminda. Minister Dangui Oduber ta sigura cu APA tin un futuro briyante cu e proyecto di Cruise Terminal Experience Development plan cu lo inicia den 2025.
