Minister di Hustisia i Polis na Sürnam, sr. Kenneth Amoksi, a ekspresá su deseo pa por yega na akuerdonan di koperashon estrecho ku Kòrsou. Asina e titular di Hustisia i Polis na Sürnam a duna di konosé durante e bishita ofisial ku minister di Hustisia di Kòrsou, mr. Shalten Hato, a realisá na su despacho.
Durante e enkuentro bilateral, minister Amoksi a indiká di kier kontinuá i fortifiká e lasonan di koperashon entre Sürnam i Kòrsou. Entre otro e minister kier pa Kòrsou kompartí e konosementu i eksperiensia optené durante e dos prosesonan di reorganisashon di kuerpo polisial.
Alabes Sürnam lo ta deseá pa kompartí konosementu ku Kòrsou riba e parti di skol i formashon di polis i tambe reorganisashon dje institutonan penitensiario. Sürnam aktualmente ta reorganisando nan instituto penitensiario pa kual tambe nan a yega na legislashon mas moderno banda di a amplia nan kapasidat.
Mas aleu minister Hato i minister Amoksi a yega na palabrashonnan pa hefe dje kuerpo polisial na Sürnam i e hefe di kuerpo polisial interino di Kòrsou, sr. Jules Ilario, kontinuá ku e kontakto bilateral. Esaki miéntras ku e hefe di servisio di seguridat di Kòrsou, sr. Jerome Beeldsnijder, tambe lo kontinuá ku kontakto bilateral ku e hefe di seguridat nashonal na Sürnam.
Minister Hato finalmente a proponé na minister Amoksi pa e dos paisnan konhuntamente traha riba konsepto di leinan pa kombatí kriminalidat sibernétiko. Minister Amoksi a indiká ku Sürnam den pasado ya tabatin akuerdonan di koperashon ku e islanan di Antias, pues Sürnam su deseo ta pa reaktivá i intensivá e koperashon i pa yega na lasonan mas estrecho entre e dos paisnan.
