Siman Minister di Husticia y Asuntonan Social Rocco Tjon a reuni cu tres organisacion cu tin un tarea primordial riba tereno di cuido pa loke ta adiccion y salud mental na Aruba.Tur tres organisacion a indica cu ta importante pa colabora mas cu otro y nan ta dispuesto pa haci esaki tambe. E intencion aki mester culmina pronto den un protocol firma tambe.
E meta principal ta pa haci cuido di adiccion y salud mental mas acesibel.
Banda di esaki a keda treci padilanti cu ta necesario pa organisacionnan activo riba e veld social keda empodera. Mas mihor e cadena social funciona, menos problema psycho-social lo tin.
E cuido ambulante tambe mester keda haya su atencion. Pa logra esaki tin aworaki un fact-team y un fact-team pa hoben. Ambos team ta consisti di e specialistanan y expertonan pa brinda e cuido ambulante. Banda di esaki e intencion ta pa a corto plaso fortifica e prome linea di cuido. Asina lo kier haci cuido pa loke ta salud mental acesibel serca e dokter di cas.
Tur tres stakeholder ta di acuerdo cu mester percura pa e diferente tipo di cuido, esta esun general y esun specialisa, “sluit aan” mas mihor riba otro. Esaki por logra atraves di un protocol di cooperacion pero tambe door di ubica e diferente instancianan bou di un dak. Y e ultimo tambe ta un plan cu tin riba mesa y cu pronto lo bay den ehecucion.
Mirando e necesidad y urgencia pa haci e cuido aki mas acesibel Ministerio di Husticia y Asuntonan Social a apunta un persona cu ta dedica solamente na e topico aki. Atraves di reunionnan semanal cu e veld lo trata na yega na un protocol prome cu fin di aña, pa asina trata na trece cambio den e situacion actual. Nos ta mira atras riba reunionnan fructifero caminda tur organisacion a indica di tin e deseo di sincronisa e procesonan y traha mas di cerca cu otro. Esaki cu e meta final pa brinda mihor cuido di salud mental.
