Despues cu Minister a Husticia mr. Andin Bikker a hiba un proceso di consulta cu diferente instancia, manera DWJZ, Censo, representantenan di Orden di Abogado, Notarionan y ademas tumando na cuenta e decretonan pendiente (‘uitvoeringslandsbesluiten’), Conseho di Ministro a dicidi cu e cambionan den e Codigo Civil lo drenta na vigor entrante dia 1 di september venidero.
Ta trata di cambionan den buki #1, cu ta atende cu ‘personen- en familierecht’, buki #3 cu ta regarda ‘vermogensrecht’, buki #4 den cual ta atende tur asunto di herencia (‘erfrecht’), buki #5 referente ‘zakelijke rechten’, buki #6 referente ‘verbintenissenrecht’, buki #7 cu ta regarda ‘bijzondere overeenkomsten’ y ademas cambionan pa medio di e Ley di Introduccion (‘Aanpassingsverordening aanvulling BWA’) cu ta regarda stipulacionnan di transicion (‘overgangsbepalingen’), diferente leynan cu ta acopla na e Codigo Civil y notanan di cambio.
Introduccion di e cambionan den Codigo Civil a bira posibel a base di e ley di introduccion cu Minister Bikker a presenta y a haya aprobacion di Parlamento recientemente (AB 2021 no. 43), y ademas a base di diferente decreto cu ta necesario pa e introduccion.
E fecha di 1 di september 2021 lo duna espacio pa diferente departamento di Gobierno y sector priva por prepara y, por ehempel, unda cu mester haya cursonan, pa por prepara pa tur e cambionan. Di parti di Gobierno lo inicia un campaña di informacion pa concientisa riba e diferente cambionan cu lo tuma luga. Ta despues di hopi aña cu ta actualisa nos leynan civil y como tal comunidad mester ta bon informa riba nan derechonan pero tambe nan obligacionnan.
Pa minister Andin Bikker, siendo un abogado renombra riba nos isla, ta un honor grandi pa por finalisa cu e proceso largo aki. E no tabata un trayectoria facil y a rekeri pa pone hopi departamento y instancianan hunto pa por a keda cla cu tur e cambionan. Pero finalmente a inclui tur e cambionan pa awo y e ta bay drenta na vigor na september. Locual mester tene na cuenta ta cu e Codigo Civil di un pais ta un ley dinamico y cu cada tanto aña mester wordo actualisa. Un di e ayudonan grandi pa esaki den futuro ta e trayecto pa purba recluta mas hurista pa traha leynan pa gobierno. Esaki semper tabata un di e factornan cu ta obstaculisa e trayecto di modernisa varios di nos leynan. Den e cuadro ey Minister Bikker a logra aña pasa na institui den cooperacion cu Universidad di Corsou y di Aruba un Academia di Ley. A base di esey den luna di juni venidero como 20 hurista lo por gradua como hurista experto den traha ley, y asina lo por asisti pa sigui modernisa nos leynan.
