Minister di finansas di Corsou a vocifera publicamente cu ladronicia a tuma luga den ENNIA

Si Minister Silvania a vocifera na radio Hoyer cu Ansari a horta cen na Ennia. Minister mester entrega keho contra Ansary den caso Ennia. Segun Steven Martina Miembro di Parlamento di Corsou  dia 27 augustus 2023 ultimo ta duna di conoce cu Minister di finansas Silvania den calidad como Minister di Finansa a expresa na radio emisora Hoyer cu: “Ansari a horta cen na Ennia“.

E expresion aki ta uno hopi pisa y a causa hopi discusion y speculacion den nos comunidad.

Horta cen y sigur si tuma en consideracion e montante di hopi miyones den e caso di Ennia, ta algo castigabel. Sigur si tene na cuenta cu e expresion aki a ser haci dor di un titular, den e caso aki Minister di Finansa, cu na mes momento ta politicamente responsabel pa Banco

Central y pa negociacionnan cu Hulanda riba refinanciamento di debenan pa soluciona entre otro e problema na Ennia.

E expresion di “Ansary a horta cen na Ennia” haci dor di Minister di Finansa ta crea e impresion cu Minister ta dispone di informacion cu otronan den gobierno y e aparato encarga cu mantencion di ley no ta dispone di dje. Nos por conclui anto, cu porfin basa riba e expresion di Minister por identifica esun cu ta responsabel pa a saca cen for di Ennia.

Pasobra si ta hortamento di cen tin na Ennia, esaki tin repercusion sumamente grandi pa, pensionadonan di Ennia, esunnan cu tin cu bay  cu pensioen, esunnan cu ta traha na Ennia, Gobierno di Corsou y al final pueblo di Corsou cu probablemente mester bay paga pa e consecuencianan di e supuesto hortamento di cen na Ennia.

E echo cu a haci e expresion “Ansari a horta cen na Ennia” pero Minister ainda no a haci denuncia di e echo castigabel aki, ta lanta hopi discusion y speculacion den nos comunidad y ta merece claridad, motibo pa cual Fraccion di MAN kier haci algun pregunta aclaratorio.

Fraccion di MAN a haci e siguiente preguntanan por escrito na Minister di Finansas

1. Minister por confirma si Minister a haci e expresion cu “Ansari a horta cen na Ennia” dia 27 augustus 2023 na radio Emisora Hoyer den un entrevista cu sr. Angelo Virginie?

2. Minister por informa cuanto cen Ansari a horta na Ennia?
3. Minister ta considera locual Minister a expresa, cu “Ansari a horta cen na Ennia” algo castigabel?

4. Ki dia nos por verwacht cu Minister ta bay haci denuncia di locual Minister a expresa cu “Ansari a horta cen na Ennia”?

5. RvM ta para tras di e expresion di Minister cu “Ansari a horta cen na Ennia” y tin un decision di RvM riba esaki?

6. Minister por indica kico ta e impacto di e “hortamento di cen di Ansari na Ennia” pa comunidad di Corsou?

7. Mirando e loke Minister a constata y empresa, esta cu “Ansari a horta cen na Ennia” lo informa parlamento di Corsou di esaki?

8. Si e contesta anterior ta “Si”, manera ta custumber, Minister lo publica esaki tambe riba medionan social?