Minister di Finansa y Cultura, Xiomara Maduro ta gradici grupo ‘Sodo y Cuero’ pa nan presentacion den cuadro di e acto di ‘Conmemoracion di 160 abolicion di sclavitud den Reino Hulandes’

Riba 1 juli 2023, Gobierno di Aruba a organisa un acto conmemorativo en conexion cu 160 aña di abolicion di sclavitud den Reino Hulandes. E meta tras di e evento tabata pa para keto y reflexiona riba e pasado di sclavitud na Aruba y tambe pa honra nos antepasadonan cu a biba y experencia e periodo aki. Un otro aspecto importante cu Gobierno di Aruba kier a ilustra riba e dia historico aki ta nos herencianan cultural manera tradicionnan, custumbernan y musica cu a origina durante e temporada di sclavitud. Un ehempel di influencia Africano cu ta biba ainda den nos comunidad y cu ta forma parti di nos cultura ta e musica di tambu. Pa e motibo aki, Minister Maduro a haya importante pa tabatin presentacion di tambu di Aruba pa cu e ocasion.  

Publico presente tabatin e honor di a wordo deleita pa e grupo ‘Sodo y Cuero’ prome cu e inicio di e programa oficial di e acto conmemorativo. Sodo y Cuero a presenta diferente cantica di varios artistanan di Aruba manera nos mama di cultura Bernadina Growell dfm y tambe e composicion impactante “E Lamento Arubiano” canta pa Vicente Ras. Minister Maduro kier a gradici e grupo ‘Sodo y Cuero’ pa nan presencia y contribucion valioso riba un dia historico pa nos pais y tambe pa mantene un parti di nos cultura musical bibo. 

Comunicado Minister di Finansa y Cultura, Xiomara Maduro