Un magnifico manifestacion cultural na honor di nos libertador Betico Croes riba dia di Betico
Diaranson anochi 24 di januari a tuma luga riba Plaza Libertador G.F. Betico Croes e Manifestacion Cultural na honor di Nos Libertador Betico Croes. Desde oranan di atardi a inicia cu presentacion di Caha di Orgel “Olga” di Arthur Kelly riba escenario mientras cu riba plaza tabata tin un feria culinario, na unda un cantidad di tent a ofrece e.o. benta di cuminda crioyo, cos dushi y artesania.
Un rato despues di 8 or di anochi, nos Himno Nacional “Aruba Dushi Tera” a wordo presenta pa Tipico Colegio Arubano forma pa alumnonan bou encargo di Meneer Jadrrick Croes. Despues cu maestronan di ceremonia Thessaly Zimmerman y Jonathan Croes a yama bon bini na un y tur na e Manifestacion Cultural organisa pa Comision Celebracion Dianan Nacional, e programa a continua.
Minister di Finansas y Cultura mr. Xiomara J. Maduro, anfitriona di e manifestacion cultural dedica na “Dia di Betico”, a hiba un elocuente discurso na unda e mandatario a refleha un rato riba bida di un gran persona, un gran lider, nos Libertador Betico Croes, e lider stima pa nos pueblo Arubano. Cu danki na Betico su vision, cu curashi, dedicacion y perseverancia, awe Aruba ta un Pais autonomo den Reino Hulandes.
E programa a sigui cu presentacion di Rosea Cultural, cual a baila e wals “Paloma Mensahero”.
Tipico Colegio Arubano forma pa studiantenan di varios nacionalidad a continua deleitando e publico cu nan talento presentando varios popular cancion manera e.o. “Dalia”, “Madua ban cas’e”, “Pilar” y “Baile di Seu”. E hobennan artistico di grupo di Baile Baile Popcorn Dancers a presenta e baile ‘bishita na Museonan di Aruba”.
E siman di Dia di Betico, mandatarionan a bishita diferente scol y di e bishitanan di Minister di Cultura a prepara un video y a presenta esaki riba pantayanan e anochi y asina un y tur por aprecia locual nos scolnan ta haci enconexion cu celebracion di “Dia di Betico”. A sigui cu presentacion di grupo Masiduri bao direccion di Vilma Kelly kendenan a presenta nos tradicion di Baile di Cinta.
Pa sera e anochi den forma fenomenal, e maestronan di ceremonia a yama riba escenario pa duna nan concierto dedica na nos Libertador Betico Croes, e Orkesta bou encargo di maestro Dwight Leoneta. E prome presentacion tabata di e gran cantante Jair “Buddy” Versprei cu a interpreta cu su tremendo bos e cancion “Bula bandera”, mesora a sigui cu nos strea local Sasha Figueroa cu a interpreta den un forma magnifico e cancion titula “Libertad”, otro di nos tremendo voz local cu a presenta na e publico tabata Ruth Gaarie interpretando e cancion “Bo ta curason di bo pais”. E anochi a continua cu presentacion di e cancion “Nos Hereo”, cual a wordo interpreta pa e talentoso hoben cantante Mitch Almary. E emocion a sigui crece bao di e publico na momento cu Edward van der Biezen a presenta e cancion popular “Pais”. Tabata un excelente presentacion di nos talentonan local riba un magnifico escenario y ekipo di sonido instala pa High Performance cu efectonan di luz, color y imagen presenta riba pantayanan.
Yegando na final di e concierto dedica na e Lider stima pa su pueblo, e orkesta a presenta un potpourri carnavalesco interpreta pa nos artistanan Teddy Philips, Freddy “Rasta” Richardson, Roy “Longroy” Illis kendenan a trece un dushi ambiente riba plaza pa un y tur presente por a gosa di dje.
Por ultimo pa sera e anochi a ser presenta un video di coleccion di “Expresionnan Historico di Betico Croes”, na unda esnan presente por a biba e momentonan mas historico di nos Libertador un biaha mas. Esaki sigur ta inspira nos y ta lanta e amor pa nos pais y ta haci nos orguyoso di ta yiu di e tera aki.
Minister di Cultura Xiomara Maduro ta gradici Comision Celebracion Dianan Nacional pa un bunita y magnifico anochi, na unda cu nos artistanan a uni talento y briya riba escenario. Danki na tur artista y musico pa haci e anochi di manifestacion cultural uno expectacular. Na tur dignatario, invitadonan y publico pa honra cu nan presencia y asina por a disfruta di e anochi dedica na Betico. Un biaha mas danki Aruba, danki na un y tur pa duna honor y respet na Betico, e Lider Stima pa su Pueblo.
