Maneho financiero serio ta dunando su frutonan
Recientemente Gobierno di Aruba a logra cumpli cu su necesidad financiero pa e prome mita di aña 2023 na un manera exitoso riba mercado local, haciendo uzo di fondo propio (surplus den presupuesto 2023) y un emision exitoso di bono di Gobierno riba mercado local. Di e manera aki Gobierno despues di hopi aña por a evita di crece e debe di nos Pais, door cu por a cubri parti di su necesidad financiero haciendo uzo di propio fondonan. Esaki ta prueba cu e maneho financiero serio di nos Pais ta dunando su frutonan.
A cuminsa baha e debe cu 35 miyon florin den e prome mita di aña 2023
Den aña 2023 Gobierno di Aruba mester paga un total di 473 miyon florin na debenan cu a wordo haci den pasado. Di e suma aki un total di 195 miyon florin mester wordo paga den e prome mita di aña 2023. Cifranan preliminario ta mustra cu Gobierno a logra paga parti di e debe aki cu 35 miyon florin cu a wordo genera fo’i propio fondonan di Presupuesto 2023. Esaki sigur ta un cambio y mehoracion grandi den e maneho financiero di nos Pais.
Surplus ta yuda baha crecemento di debe
Den añanan anterior Gobierno cada bes mester a refinancia e pago di e debenan cu ta madura, pa motibo cu no por a genera fondo propio (surplus) cu ta necesario pa realmente por a cuminsa paga e debe bek. E prome resultadonan di aña 2023 ta mustra cu e aña aki esey lo bira diferente. Un cambio den e forma con ta atende cu e debe nacional a bira posibel danki na e resultadonan financiero den e prome parti di e aña aki. Gobierno di Aruba por a genera suficiente entrada pa por a paga 35 miyon florin na debenan bek, sin cu tabata necesario pa financia esaki. Esaki ta nifica cu efectivamente e surplus di 35 miyon florin a yuda pa baha e crecemento di debe den e prome mita di aña 2023.
A emiti un bono exitoso pa cubri e resto di e necesidad financiero pa mita di aña 2023
E restante di e 195 miyon florin, e 160 miyon florin cu mester a paga den e prome parti di aña 2023 a wordo paga pa medio di un bono di Gobierno cu a wordo emiti exitosamente contra un interes di 5,73%. E demanda pa e bono aki di parti di inverstionistanan y publico riba e mercado local a resulta di ta substancial y a keda registra na 125% mas grandi compara cu locual Gobierno a pidi. Esaki na su turno a pone cu e bono por a wordo emiti na un prijs mas competitivo.
Mester baha debe pa por baha gasto di interes
E ta sumamente importante pa Gobierno baha e debe di Pais Aruba. Mas e debe crece, mas gasto tin di interes. Pa aña 2023 e debe nacional lo costa Aruba aproximadamente 262 miyon florin na gasto
di interes. Esaki ta un di e gastonan mas grandi cu Gobierno di Aruba tin y den Presupuesto 2023 por compara esaki cu gastonan presupuesta pa Ministerio di Enseñansa y Ministerio di Husticia cu ta dos di e ministerionan di mas grandi den Gobierno di Aruba. Mas placa bay pa cubri gasto di interes, ta menos placa ta resta pa por inverti. Pa e motibo aki mester baha e gasto di interes halto, y pa haci esaki, mester baha e nivel di e debe.
Gobierno di Aruba a indica den deliberacion cu, entre otro, inversionistanan, rating agencies y IMF, cu e intencion e aña aki ta, pa cuminsa baha e parti externo di e debe di Pais Aruba. Por bisa cu den e prome mita di aña 2023, Aruba a logra baha un 94 miyon florin di su debenan internacional, sea pagando bek of pa medio di e bono riba mercado local. Esaki sigur ta un bon señal cu Gobierno di Aruba ta hiba un maneho financiero serio cu ta duna su fruto.
Maneho financiero serio ta dunando su fruto
E resultado den e prome mita di aña 2023, ta un prome indicacion cu Gobierno di Aruba ta riba e bon caminda pa logra e meta pa baha e debe nacional cu aproximadamente 60 miyon florin den aña 2023. Minister Maduro ta informa cu e siguiente bono pa cubri e restante di e necesidad financiero di Gobierno di Aruba den aña 2023, lo wordo emiti den luna di juli y ta spera cu inversionistanan local un biaha mas lo sa di reconoce e balor di Aruba como un inversion solido. E mandatario di finansa ta gradici tur instancia y persona cu ta yudando pa asina por implementa e cambionan necesario y ta apoya e maneho financiero serio cu ta wordo hiba na bienestar di ful Aruba. Masha danki pa kere den Aruba!
Comunicado Minister di Finansa Xiomara Maduro