Di e forma aki Minister Croes ta para ketu nan nos historia i kultura i duna rekonosementu na personanan ku di un òf otro manera a nifiká hopi pa e sektor aki.
Djadumingu 11 di yanuari 2021 Minister di Enseñansa, Siensia, Kultura i Deporte (ESKD), Sr. Steven Croes a hasi un bishita serka señornan Wilfred i Alex Suares ku tabatin un trayektora largu riba tereno di enseñansa i alabes a aportá grandemente na desaroyo di nan bario Rooi Santu i deporte den e bario aki.
Alex Suares a bai skol na Montaña i for di mucha chikí e kera bira mener di skol. Ela siña serka fraternan i ta super gradesido ku e edukashon ku ela haña serka nan. Alex a traha na skol di Montaña i tabata un maestro masha positivo. E ta kòrda kon ela bira kabes di skol na Flamboyantschool na Montaña den 24 ora. E kabes di skol mester a bira funshonario i a skohe su persona pa bira kabes di skol, un puesto ku e mester a asumí un dia despues ku a puntre.
Despues di tabata kabes di skol, ela bira funshonario pa Direktiva di Skolnan Katóliko pa varios ana. Despues ku ela baha ku penshun Alex a duna lès un periodo na Feffik.
Wilfred Suares tambe a bai skol na Montaña i a kuminsá traha komo mener di skol na Montáña. E tabata studia na Hulanda pa dosente i e kabes di San Dominico skol na Montaña, sr. Thijsen, a pidie bin Kòrsou. E ta rekòrdá kon e kabes di skol mes a bin buska na Hato, pa su dia despues mes e kuminsa traha na e skol na Montaña, kaminda ela traha pa 15 aña. Wilfred a traha komo inspektor den enseñansa tambe.
Riba pregunta di Minister Croes tokante uso di Papiamentu den skol, tur dos ruman a enfatisá e importansia pa Papiamentu hana atenshon den skol. Segun nan antes tabata dediká muchu mas tempu na idioma, sigur na Hulandes. Mester pone muchu mas antenshon na lesamentu. Alex ta splika ku e gusta lesa i semper ela bisa tur alumno pa nan lesa hopi. Ta asina bo ta desaroyá un idioma mas lihé i mas mihó. No lesa buki so, pero lesa korant, traha pùzel, lesa kiko ta pasa rònt mundu.
Tantu Wilfred komo Alex ta konsiente ku tempu a kambia hopi. Den nan tempu, maestronan di skol mester a bisti kamisa manga largu ku dashi. Nan ta di akuerdo ku Minister Croes ku kompertashon a bai hopi atras. E mentalidat di pueblo tambe a kambia. Segun rumannan Suares por trese un kambio si pone mas atenshon na deporte, kultura, norma, balor i disiplina den skol. Tur tempu tabatin mucha ku malkomportashon, pero nan tabata usa hopi disiplina pa koregí e komportashon.
Un aspekto remarkabel na e famia Suares aki ta nan aporte na e bario di Rooi Santu i Montaña. Ounke nan a studia den eksterior i hasi diferente funshon haltu, nan a skohe pa keda biba den Rooi Santu i aportá na desaroyo di nan bario. Pa hopi ana famia Suares tabatin un hòfi den Rooi Santu ku no tabatin un nomber. Na komienso di añanan 90, e ruman Henry a introdusí un “ sentro pa hasi fiesta” den e hòfi i for di e tempu ei a yama e hòfi Calabash, refiriendo asina na e palu mas bieu den e hòfi. Henry Suares ta un di e rumannan ku a hasi hopi aktividat sosial i riba tereno di deporte den bario di Rooi Santu. Nan a praktiká baseball tambe den un tim ku tabata yama Noord Janthiel Giants.
Minister Croes ta wak bèk riba un kombersashon ameno ku e rumannan Suares, un famia ku un fundeshi fuerte, bibando pa hopi aña den Rooi Santu. Durante e kombersashon a resaltá e importansha pa duna bèk na bo pais, speshal na e bario ku bo a nase i krese aden, na momentu bo mes haña un chèns pa desaroyá i bai dilanti. Minister Croes ta spera di e forma aki mustra un bia mas riba balor di un bon edukashon i pa for di chikí siña nos yunan kiko ta disiplina i siña nan partisipá den komunidat i stima nan pais.
