Djabièrne último Minister di Enseñansa, Siensia, Kultura i Deporte (ESKD) Sr. Steven Croes a hiba un bishita na Instituto pa Formashon den Enfermeria (IFE), kaminda e direktiva a duna un rekorido di e skol. Tambe Minister Croes por a sigui un pida di un lès ku tabata den seshon. Sektor di kuido ta un sektor hopi importante pa nos komunidat i un instituto manera IFE ta krusial pa formashon di nos hobennan ku ke un karera den e sektor aki.
Den un ambiente ameno a papia riba diferente desaroyonan na IFE i retonan ku e skol tin. Un di e esaki nan ta e asina yama “BIG-registratie”, un registrashon di moda ku tur enfermera i trahadonan den sektor di salubridat ta keda registra i obligatoriamente ta sigui upgrade nan mes pa garantisá un nivel haltu di kalidat di kuido. E lei a pasa pero mester traha ainda riba e registrashon mes pa e lei por drenta na vigor. Tambe tin un bon koperashon entre Universidat di Korsou (UoC) i IFE, ku nan lo ke mira muchu mas estrecho pa asina traha riba un HBO opleiding pa salubridat. Un punto ku Minister Croes a primintí pa atendè mesora ku su ministerio i ku UoC den su proksimo bisita na e universidat.
Tambe IFE a trese e nesesidat pa kai bou di maneho di enseñansa avansá i e lei ku ta den preparashon. Otro punto ta un koperashon mas estrecho entre Curacao Medical Center (CMC) i IFE, pa entre otro, luga di stazje pa studiantenan di IFE, “nascholing” di personal di CMC ets. Prinsipalmente den e situashon di Covid-19, e posibilidat pa studiantenan hana un luga pa stazje a bira difisil.
Otro punto ta e situashon finansiero di studiantenan, ku for di introdukshon di enseñansa liber no ta haña finasiamentu di estudio mas, lokual ta limitá e stuadiantenan den nan posbilidat pa ta más independiente. Minister a keda di wak kon lihe lo por hasi posibel pa studiantenan di SBO bini na remarke pa risibí finasiamentu di estudio bèk. Ta bon pa remarká ku esaki si ta e kaso pa studiantenan di islanan BES
IFE a mustra tambe riba e nesesidat pa Inspekshon di Enseñasa traha huntu ku Inspekshon di Salubridat pa por garantisá un inspekshon ku ta wak tambe e nivel di kalidat di kuido ku IFE ta prepará e studiante pe.
IFE ta brinda un kalidat haltu na formashon di enfermeronan i ta trahando den estrecho koperashon ku ROC Ameresfoort. Tambe a kuminsa traha riba un koperashon ku Hogeschool Rotterdam, un punto ku Minister Croes a keda di atende tambe den su proksimo kombersashonann ku Hulanda.
