A elabora riba varios puntonan di interes, na unda e colaboracion y sosten di Gobierno ta di gran balor.
Diahuebs merdia Minister Endy Croes a haci bishita oficial na Universidad di Aruba. E Mandatario di Enseñansa a wordo ricibi pa miembronan di Colegio di Curatornan, drs. Angelo Brete, mr. Eugene Martis y Rector di Universidad, sra. dr. Viola Heutger. Director di Operacional di Universidad, Sr. Patrick Arens a duna Minister Endy Croes y su conseheronan un recorido den e edificio y tambe a conta e historia di e edificio cu ainda tin e nomber di La Salle. Universidad tin mas cu 700 studiante reparti over di cinco facultad y Academic Foundation Year. Despues di e recorido sra. Ivetta van Veen, Manager Financiero di e instituto a duna Minister Endy Croes y delegacion un presentation amplio di e finanzas, cantidad di studiante y facultadnan. Tambe sr. Arens a splica e ultimo desaroyo y retonan.
E Mandatraio a sigui bisa cu SISSTEM ta un programa academico cu ta wordo financia cu fondonan di Union Europeo, pero cu entrante 2023 lo mester wordo financia door di Gobierno di Aruba mes. Rector di Universidad, dr. Heutger a subraya e importancia di e sosten financiero di Gobierno di Aruba pa por logra acreditacion di dos programa den e temporada venidero. Minister Endy Croes tabatin varios pregunta di e efectonan di Covid19 riba operacion y finanzas di e instituto. Universidad di Aruba a elabora riba recorte financiero cu nan a logra di haci den e temporada dificil tras di lomba pa contribui na pais Aruba y tambe pa financia proyectonan sin cu mester haci un apelacion financiero riba Gobierno. Funcionarionan di Universidad a keda masha contento cu e bishita di e Mandatario di Enseñansa, y principalmente pe preguntanan al caso cu a wordo haci.
Minister Endy Croes tabatin hopi interes pa e programa Shoco Wellness, cu ta duna studiante y personal di Universidad di Aruba sosten emocional y psicologico. Un programa cu Universidad di Aruba a inicia un par di aña atras y a demostra su importancia caba pa cu e sosten cu studiantenan mester riba tereno di bienestar general y salud mental. Minister Endy Croes a finalisa e atardi na Universidad di Aruba, indicando cu e ta desea di sigui mira colaboracion estrecho cu IPA. Como tambe Universidad por duna su Ministerio conseho riba temanan pa sigui mehora calidad di enseñansa na Aruba. Sigur por mira tras riba un bon bishita y tremendo reunion unda colaboracion entre partidonan y sosten di Gobierno ta di gran balor.
