Minister di Desaroyo ekonómiko Steven Martina ta anunsiá ku for di djaluna 4 di yanüari 2021, empresanan por apliká pa un sosten di nan gastunan operashonal fiho. Banda di e areglo di “NOW” ku tin ku yuda empresanan mantené trahadó den servisio, e fasilidat di krédito pa empresa chikí, mediano i tambe e sosten pa empresario individual, ta bini un sosten èkstra pa empresanan di Kòrsou. TVL (Tegemoetkoming Vaste Lasten) ta yuda empresanan ku nan gastunan operashonal fiho. Empresanan ku tin trahadó i a sufri un pèrdida di entrada promedio di mas ku 25% den luna di yüli pa sèptèmber 2020, ta bini na remarke pa e areglo akí.
Gastunan operashonal fiho ta gastunan ku ta sigui kore maske ku e empresa no tin entrada. Ta trata di gastunan manera entre otro hür, propiedat inmóbil, interes i pagonan di fiansa, seguro, pagonan di “lease” i abonado. Ku e sosten di e gastunan operashonal fiho gobièrnu ta hasi posibel pa e empresa por paga su kréditornan. Segun Gobièrnu esaki ta yuda evitá un efekto di dominó, debí ku e empresa no por kumpli ku su debernan na otro empresanan manera entre otro seguro i banko esaki na su turno por pone ku e empresanan aki ta haña nan ku problema di likides. Mas aleu gobièrnu ta indiká ku pa empresanan di Kòrsou, tin un montante di NAf. 23,8 mion disponibel pa e sosten di gastunan operashonal fiho.
Ku introdukshon di e sosten akí, Minister Martina i Gobièrnu di Kòrsou, ta spera di duna e empresanan un alivio èkstra. Esaki ta hopi agudo mirando efektonan mundial kousá pa e pandemia i e impakto ku sierto medidanan ku Gobièrnu a introdusí pa salbaguardiá salubridat públiko por tabatin riba nos empresanan segun gobièrnu.
I pa pueblo awor gobièrnu? No tin Alivio? … E impakto di e medidanan no ta konta pa pueblo tambe? …
Un bes mas gabinete Rhuggenaath ta mustra di ta goberná pa komersiante i gran kapital ku ta finansiadó di nan kampaña. Tremendo regalo nan ta risibí pa habri 2021 ku speransa.
I pueblo gabinete Rhugenaath? Ki speransa tin pa nos? 2021 no tin perspektiva, bienestar, salú, dicha òf prosperidat pa pueblo? Bo a klap bo ámtenarnan ayera den parlamento un bendito 12.5% ku forsa retroaktivo. E paisano sin trabou ta habri 2021 ku e mésun preokupashon i sin perspektiva. Esun ku ta risibí pakete di kuminda òf ku ta kumpra riba karchi di sosten bo ta sigui kibra su orguyo, dignidat i outo estima. Esun ku a pèrdè 20% di entrada pa motibu ku su doño di trabou a apliká pa NOW, tin ku sigui wak kon sobrebibí. Gobièrnu pa bo informashon e trahadó tambe tin “VASTE LASTEN”. E tin hür, hipotek, koriente, awa, gas, internèt, number di outo i seguro pa paga.
Pa komersiantenan ta bolbe inbertí 23, 8 mion meskos ku tur e mionnan ku ya bo a inbertí sin niun garantía. Pasobra nan ta kobra NOW hinka e plaka den nan saku, manda trahadónan kas i dal porta sera. Nos a mira esaki pasa na Hyatt.
Gabinete Rhuggenaath ta sigui mustra ku e mester di pueblo nèt 5 minüt 19 di mart pa e por regresá den fòrti. Pa logra esaki e mester di sosten di komersiante p’e por influensiá i manipulá pueblo su eskoho 19 mart awor. No ta nada straño ku parti di e plaka aki ta resultá den kampaña
Pa nos skapa di e hendenan aki pueblo nos mester vota konsiente, sa e importansia i balor di nos parlamento, sa ken bo ta laga representa bo ku realmente lo manehá na bo bienestar i no esun di e komersiante.
Movementu Kousa Promé su punto di prinsipio ta ku Kòrsou ta di e yu di Kòrsou. Un gobièrnu patriótiko i humano ku ta tuma desishon konstantemente na benefisio di e pueblo i no di un grupitu.
