Nos muchanan a siña hopi y a gosa di e programa hunto cu famia
Diasabra ultimo a tuma luga e programa Kibra Coco, Edicion Himno y Bandera y esaki a resulta un biaha mas exitoso. Nos muchanan di scol basico hunto cu famia a participa den e programa di competencia virtual na television. Jean Carlo Espinal tabata conduci e programa y haci e preguntanan di e tres tandanan, e preguntanan tabata concentra riba e tres simbolonan nacional cual ta Nos Himno, Nos Bandera y Nos Escudo. Na comienso di cada tanda a presenta un video clip cu informacion riba nos himno, nos bandera y nos escudo.
E biaha aki a invita e ganadonan di Festival Un Canto pa Aruba su Himno y Bandera categoria Infantil y pre-Hubenil, Qu-Lainey Jansen, Ishem Howell-Brokken y Stephanie Quant, kendenan a presenta nan cancion ganado durante e programa. Pa minister di Cultura sra. Xiomara Maduro tabata un honor y placer pa por ta presente den e programa cu ya tin su acogida den comunidad pa chikito y grandi. E mandatario a trece dilanti di ta hopi contento cu e programa y como mandatario su maneho ta pa sigui contribui pa nos comunidad wordo bon informa y educa riba historia di nos Dianan Nacional y Fiestanan Cultural di nos Pais. Su mensahe ta pa nos como arubiano stima nos pais Aruba den mente y curazon. Jufrouw Maybelline Arends-Croes kende a forma parti di varios comision pa e inauguracion di nos Himno y Bandera 46 aña pasa, tambe tabata invitado y a comparti un poco di su experencia.
E resultado di e competencia tabata lo siguiente Prome Tanda na Prome luga a resulta Gerson Winklaar di Maria School, di dos luga Zineidy Croes di Maria Goretti College y di tres luga Javen Croes di Reina Beatrix Basis School. Den e di Dos Tanda na prome luga a resulta Iva Werleman, na di dos luga Lia-Sophie Richardson di Mon Plaisir Basis School y na di tres luga James Oduber di Scol Basico Dornasol. Pa locual ta e di tres Tanda e resultado ta prome luga Ruggielle Marquez di St. Rosa College, di dos luga John-Maximus Wever di Colegio San Hose y di tres luga Gideon Croes di Maria School. Pa cada tanda tin premio, e prome premio ta consisti di un premio pa e mucha mes, como tambe un premio pa su famia y pa su klas.
Pa di dos y di tres luga e muchanan a gana un premio pa nan mes. Pa locual ta e seccion di Kibra Coco Himno y Bandera Challenge e anfitriona tabata Hilyann Croes kende tabata encarga un biaha mas pa anima esnan na cas pa participa y manda nan potret hunto cu nan mascota y con nan ta pasando. Hilyann Croes tabata presenta e potretnan di tur esnan cu a participa den e seccion aki riba pantaya. Na final e ganado a wordo anuncia cual a resulta di ta e grupo di María Camila Delgado, María Alejandra Delgado, Meredith Garcia, Isabela Garcia y Euli Escobar.
Tambe durante e programa a anuncia e klas ganador di e Competencia pa klasnan diu scolnan preparario “Un Rima pa mi Isla”. Ganado a keda den scol di Arco Iris Kleuterschool y klas di Juf Mariebelle klas roos. Na di dos luga a keda den scol di Arco Iris Kleuterschool y klas di juf Nyree klas blauw. Na di tres luga a keda den scol di Imelda Kleuterschool y klas di Juf Dani klas 4. Masha masha pabien y danki pa inspira nos muchanan cu tremendo rimanan pa nos isla.
E comision organisado ta tumando contacto cu tur ganado pa asina por programa e dia pa entrega di e premionan den siman nos dilanti.
Minister Xiomara Maduro ta gradici e tur partipante, e team organisado y tur esnan cu a contribui y coopera pa haci ‘Kibra Coco’ edicion ‘Himno y Bandera’ un exito un biaha mas. Danki na CCDN, Departamento di Cultura, comision di docentenan, Telearuba, Setar y High Performance. Un danki tambe na Setar, ATA, AAA, Utilities Group forma pa WEB, Elmar y Utilities, APA, Ministerio di Naturaleza, Urataka Center y Aruba Waterpark cu a aporta cu premio pa e ganadonan di Kibra Coco edicion Himno y Bandera.
