Dia 21 di mei ultimo, nos ta recorda cu 20 aña pasa Parlamento di Aruba a oficialisa Papiamento como nos idioma oficial banda di hulandes. Relaciona cu esaki Minister di Cultura Maduro ta comparti algun informacion y cifranan interesante cu comunidad relaciona cu nos idioma Papiamento. Segun cifranan di Oficina di Registro Civil y Censo di 2022, e poblacion actual di Aruba ta consisti di personanan naci na 131 diferente pais y cu 99 diferente nacionalidad.
E multiculturalidad di nos poblacion tambe ta refleha su mes den e mescla di idiomanan cu ta wordo papia den hogarnan na Aruba. Otro informacion interesante pa comparti ta cu segun cifranan di Censo Piloto 2019, den casi mita (47%) di hogarnan, mas cu un idioma ta wordo papia. Asina mes, Papiamento ta e idioma mas papia na Aruba. Den total, 8 di cada 10 persona na Aruba ta papia Papiamento na cas, sea Papiamento so (4 di cada 10 persona) of den combinacion cu un of mas otro idioma.
E mandatario encarga cu cultura ta sigui elabora cu ora ta trata di personanan naci na Aruba, 9 di cada 10 ta papia Papiamento na cas. Pero no ta nan so, esnan cu a nace den exterior y a bin biba na Aruba tambe ta papia Papiamento na cas. Di esnan cu a nace den exterior, 6 di cada 10 ta papia Papiamento na cas. Di esnan cu tin e nacionalidad Hulandes, casi 9 di cada 10 ta papia Papiamento na cas.
E porcentahe mas halto di personanan cu ta papia Papiamento na cas ta biba na Paradera, Santa Cruz, San Nicolas noord of Oranjestad oost. Na Oranjestad oost tin e porcentahe mas halto di persona cu ta papia solamente Papiamento na cas, sigui pa Santa Cruz y San Nicolas noord. Esaki tabata algun datonan interesante pa nos comunidad por ta na altura di dje.
Banda di e responsabilidad di nos tur pa papia y skirbi Papiamento, pa Minister di Cultura ta importante pa sigui educa y informa nos comunidad riba nos idioma Papiamento, pasobra mas informa y educa nos ta riba nos idioma Papiamento, mas nos lo apreci’e, stim’e y cuid’e.
